Praqa, 18 fevral, AZƏRTAC
Çexiya Silahlı Qüvvələrinin aktiv ehtiyat bölməsində xidmətə maraq artmaqda davam edir.
AZƏRTAC xəbər verir ki, son məlumatlara görə, 2025-ci il ərzində bu proqram üzrə müraciətlərin sayı əvvəlki illə müqayisədə əhəmiyyətli dərəcədə yüksəlib. Ən çox müraciət paytaxtda və iri regional mərkəzlərdə qeydə alınır. Hərbi rəhbərlik bu tendensiyanı müsbət siqnal kimi qiymətləndirir və qarşıdakı illərdə ehtiyatda olanların sayını iki dəfə artırmağı planlaşdırır.
Müraciətlərin çoxalması səbəbindən hərbi idarələr qəbul prosesini daha çevik təşkil etməyə başlayıb. Qeyd olunur ki, namizədlərin əksəriyyəti mülki işlə məşğul olduğu üçün sənədləşmə və ilkin prosedurlar onların iş qrafikinə uyğunlaşdırılır. Müraciət edənlərin motivasiyası müxtəlifdir: bəziləri yeni bacarıqlar əldə etmək və özünü sınamaq, digərləri isə fiziki hazırlığını artırmaq və intizamlı mühitdə təcrübə qazanmaq istəyir.
Statistikaya əsasən, aktiv ehtiyata qoşulanlar arasında gənclərin və qadınların payı da artmaqdadır. Xüsusilə 2022-ci ildən sonra təhlükəsizliklə bağlı narahatlıqlar fonunda bu maraq daha da güclənib. Mütəxəssislər bildirirlər ki, aktiv ehtiyat xidməti peşəkar orduya dəstək verməklə yanaşı, cəmiyyətin böhran vəziyyətlərinə hazırlıq səviyyəsini də yüksəldir.
Eyni zamanda, qanunvericilik müəyyən vəzifə sahiblərinin bu xidmətdə iştirakını məhdudlaşdırır. Bu məhdudiyyətlər dövlət institutlarının fövqəladə hallarda fasiləsiz fəaliyyətini təmin etmək məqsədi daşıyır. Aktiv ehtiyat sistemi çərçivəsində vətəndaşlar mülki həyatlarını davam etdirməklə yanaşı, dövri təlimlərdə iştirak edir və zərurət yarandıqda Çexiya Silahlı Qüvvələrinin gücləndirilməsinə cəlb oluna bilirlər.
AZƏRTAC-ın xüsusi müxbiri
Praqa
