İsrail ABŞ ilə İrana qarşı birgə hərbi əməliyyata hazırlaşır və əməliyyatın hədəfləri arasında ballistik raket bazaları, nüvə obyektləri və İslam İnqilabı Keşikçiləri Korpusunun (SEPAH, İran Silahlı Qüvvələrinin elit bölməsi) qərargahı ola bilər.
Yeniavaz.com xəbər verir ki, bu barədə “The New York Times” (NYT) qəzeti İsrail hərbi rəsmilərinə istinadla məlumat yayıb.
Onlar bildiriblər ki, ABŞ və İsrail İranı Tehranın indiyə qədər razılaşmadığı iddia edilən nüvə sazişi ilə bağlı danışıqlar masasında güzəştə getməyə məcbur etmək üçün bir neçə gün ərzində şiddətli zərbə endirməyi planlaşdırır.
Qəzet iddia edir ki, ABŞ ordusunun Yaxın Şərqdə yerləşdirilməsi qısa və orta mənzilli raket bazaları, sursat anbarları, nüvə obyektləri və İslam İnqilabı Keşikçiləri Korpusunun qərargahı kimi digər hərbi hədəflər də daxil olmaqla geniş miqyaslı hədəflərə zərbələr endirməyə imkan verir.
Qəzetin Amerika mənbələrinə görə, əməliyyat üçün son hədəf seçimi ABŞ Prezidenti Donald Trampa aiddir.
Qeyd edək ki, “CBS News” telekanalı əvvəllər ABŞ administrasiyasının 21 fevralda İrana zərbə endirməyi nəzərdən keçirdiyini bildirmişdi.
Xatırladaq ki, fevralın 17-də Cenevrədə Omanın vasitəçiliyi ilə ABŞ və İran arasında nüvə danışıqlarının ikinci mərhələsi keçirilib. İranın xarici işlər naziri Abbas Əraqçinin sözlərinə görə, tərəflər bir sıra məsələlərdə qarşılıqlı anlaşma əldə ediblər və bu məsələlər gələcək nüvə sazişinin layihəsinə daxil edilə bilər.
ABŞ vitse-prezidenti Ceyms Devid Vens məsləhətləşmələrin bir sıra aspektlər üzrə yaxşı keçdiyini, lakin Tehranın hələlik Ağ Ev tərəfindən irəli sürülən bir neçə prinsipial mövqeyi qəbul etməyə hazır olmadığını bildirib.
