Qanun 1999–2026-cı illərdə siyasi motivlərlə məhkum olunan şəxsləri əhatə edir...
Poliqon xəbər verir ki, Venesuela Milli Assambleyası Demokratik Birgəyaşayış üçün Amnistiya Qanununu qəbul edib. Sənəd 1 yanvar 1999-cu ildən 2026-cı ilə qədər siyasi motivlərlə məhkum olunmuş şəxslərin azadlığa buraxılmasını nəzərdə tutur.
“Demokratik Birgəyaşayış üçün Amnistiya Qanunu deputatlar tərəfindən yekdilliklə qəbul edildi”, deyə parlamentin sədri Xorxe Rodriges dövlət televiziyası Venezolana de Television-nun efirində bildirib. Qanun layihəsinin təşəbbüskarı isə dövlət başçısının vəzifələrini icra edən Delsi Rodriges olub.
Qanuna əsasən, təhrikçilik, hakimiyyətə müqavimət, üsyan və dövlətə xəyanət maddələri ilə məhkum edilmiş şəxslər amnistiyadan yararlana biləcəklər. Bundan əlavə, sənəd müsadirə olunmuş əmlakın geri qaytarılmasını və məcburi mühacirətdə olan şəxslərin vətənə dönüş imkanını da nəzərdə tutur.
Amnistiya insan hüquqlarının pozulması, qətl, korrupsiya və narkotik vasitələrin qanunsuz dövriyyəsi maddələri ilə məhkum olunmuş şəxslərə şamil edilmir.
Poliqon.info
