Mart ayından etibarən birdəfəlik viza 30 dollar olacaq, çoxdəfəlik vizanın rüsumu dəyişməz qalır...
Misir gələn aydan etibarən ölkəyə giriş vizasının qiymətini artıracaq.
Poliqon xəbər verir ki, bu barədə Cairo 24 nəşri Turizm şirkətləri və agentlikləri palatasına istinadən məlumat yayıb.
Məlumata görə, qərar Misirin hava limanları və digər sərhəd-keçid məntəqələrində verilən birdəfəlik giriş vizalarına şamil olunur. Martın 1-dən etibarən həmin vizanın rüsumu əvvəlki 25 dollar əvəzinə 30 dollar təşkil edəcək.
Bununla yanaşı, çoxdəfəlik giriş vizasının qiymətində dəyişiklik nəzərdə tutulmur. Həmin viza üçün ödəniş əvvəlki kimi 60 dollar olaraq qalacaq.
Turizm sektorunun nümayəndələri bildirirlər ki, rüsum artımı ölkənin turizm infrastrukturunun inkişafı və xidmət keyfiyyətinin yaxşılaşdırılması ilə əlaqələndirilir. Misir hakimiyyəti turizm sahəsini milli iqtisadiyyatın əsas gəlir mənbələrindən biri hesab edir və bu istiqamətdə gəlirlərin artırılmasına çalışır.
Eyni zamanda qeyd olunur ki, Şarm əl-Şeyx hava limanına gələn və yalnız Sinay yarımadası ərazisində 15 gündən artıq qalmayacaq turistlər üçün giriş əvvəlki qaydada pulsuz olacaq. Bu güzəşt regionun turizm cəlbediciliyini qorumaq məqsədi daşıyır.
Poliqon.info
