Sakaryada şirniyyat sexində xəmiri ayaqla yoğuran işçiyə görə müəssisə bağlanıb.
İnterpress.az xəbər verir ki, bu barədə Türkiyə KİV-ləri məlumat yayıb.
Türkiyənin Sakarya əyalətinin Akyazı rayonunda yerli şirniyyat sexinin fəaliyyətinə son qoyan böyük qalmaqal baş verib.
Hadisəyə səbəb müəssisənin işçisinin istehsalat sahəsində xəmiri birbaşa ayaqları ilə yoğurmasını əks etdirən videogörüntülərin yayılması olub. İnsidentin şərq şirniyyatlarına tələbatın ən yüksək həddə çatdığı müqəddəs Ramazan ayında baş verməsi ictimaiyyətin ciddi narazılığına səbəb olub.
Vətəndaşların şikayətlərindən sonra bələdiyyə xidmətləri tərəfindən müəssisədə növbədənkənar yoxlama aparılıb.
Reydin nəticələri müfəttişləri şoka salıb: məlum olub ki, işçilər papaqsız və əlcəksiz çalışır, sexin daxilində yalın ayaqla hərəkət edir, steril zonalar isə acınacaqlı antisanitar vəziyyətdədir.
Yoxlamanın yekunu olaraq istehsalat sahəsinin və ona bitişik mağazanın fəaliyyəti dərhal dayandırılıb.
Bələdiyyə xidmətləri tərəfindən müəssisənin qapıları möhürlənib.
Xuraman Etibarlı
İnterpress.az
