ABŞ-nin vitse-prezidenti zərbə halında ölkənin uzunmüddətli münaqişəyə cəlb oluna biləcəyini istisna etmir...
ABŞ-nin vitse-prezidenti J. D. Vance son daxili müzakirələr zamanı İran-a qarşı mümkün hərbi zərbənin ABŞ-ni uzunmüddətli və mürəkkəb münaqişəyə cəlb edə biləcəyi ehtimalı ilə bağlı narahatlığını ifadə edib.
Poliqon xəbər verir ki, bu barədə Axios portalı məlumat yayıb.
Məlumata görə, Vens müzakirələr zamanı hərbi rəhbərlik və milli təhlükəsizlik strukturlarının nümayəndələrinə potensial əməliyyatın riskləri, mümkün nəticələri və həyata keçirilməsinin çətinlikləri ilə bağlı bir sıra suallar ünvanlayıb. Bununla belə, o, İrana qarşı zərbə endirilməsi variantına prinsipial şəkildə qarşı çıxmayıb və məsələ ilə bağlı ehtiyatlı yanaşma nümayiş etdirib.
Nəşrin məlumatında qeyd olunur ki, vitse-prezident diplomatik həll imkanlarının hələ də aktuallığını qoruduğunu hesab edir. O, bu həftə Cenevrədə keçiriləcək danışıqların müəyyən diplomatik irəliləyişlə nəticələnə biləcəyinə ümid edir. Bununla yanaşı, Vens mümkün razılaşmanın əldə olunması ehtimalına skeptik yanaşır.
Bildirilir ki, oxşar mövqe ABŞ administrasiyasındakı bir sıra yüksək vəzifəli rəsmilər tərəfindən də bölüşülür. Müşahidəçilərin fikrincə, Vaşinqtonda həm hərbi variantın mümkün nəticələri, həm də regionda gərginliyin genişmiqyaslı qarşıdurmaya çevrilməsi riskləri ciddi şəkildə qiymətləndirilir.
Poliqon.info
