İtaliyada keçirilən Qış Olimpiya Oyunlarını yalnız bir gümüş medalla başa vuran Rusiya, tarixdəki ən pis göstəricisini qeydə alıb.
Hafta.az yazır ki, ikinci dəfə ardıcıl olaraq idmançılar bayraqsız və beynəlxalq sanksiyalar səbəbindən məhdud heyətlə yarışıblar.
Rusiyanın yeganə medalı Nikita Filippovun xizək alpinizmində qazandığı gümüş medal olub. Cəmi 13 idmançı ilə iştirak edən Rusiya, beynəlxalq arenada tətbiq olunan məhdudiyyətlər səbəbindən məhdud heyətlə yarışıb. Bu rəqəm ölkənin Olimpiya tarixində ən aşağı iştirak rəqəmlərindən biri kimi qeydə alınıb.
Ukraynaya qarşı müharibə səbəbindən Beynəlxalq Olimpiya Komitəsi (BOK) tərəfindən tətbiq edilən sanksiyalar altında Rusiya idmançıları ardıcıl ikinci dəfə bayraqsız və dövlət himni olmadan yarışıblar. İdmançılar tədbirdə "fərdi neytral idmançılar" statusu altında iştirak ediblər. Bu vəziyyət Rusiyanın Olimpiya iştirakını simvolik səviyyəyə endirib, əldə edilən idman nəticələri isə ölkə tarixində ən aşağı nöqtəyə düşüb.
