Ağ Ev administrasiyası Ali Məhkəmənin qərarından sonra tarif siyasətini yenidən qurur...
ABŞ-nin administrasiyası altı sənaye sahəsində yeni gömrük rüsumlarının tətbiqi imkanını nəzərdən keçirir.
Poliqon xəbər verir ki, bu barədə The Wall Street Journal qəzeti mənbələrə istinadən məlumat yayıb.
Qəzetin yazdığına görə, rəsmi Vaşinqton xüsusilə böyük tutumlu batareyalara, çuqun və dəmir birləşdirici detallara, plastik borulara, sənaye kimyəvi maddələrinə, enerji sistemləri üçün avadanlıqlara və telekommunikasiya texnikasına əlavə rüsumlar tətbiq etməyi planlaşdırır. Bildirilir ki, administrasiya bunun üçün Ticarət Qanununun 232-ci maddəsindən istifadə etməyi düşünür. Həmin maddə prezidentə milli təhlükəsizlik maraqları əsasında tariflər tətbiq etmək səlahiyyəti verir.
Ağ Evin aparat rəhbərinin müavini Stiven Miller ötən həftə bildirib ki, Ali Məhkəmə prezidentin, o cümlədən 232-ci maddəyə uyğun olaraq, rüsumlar tətbiq etmək səlahiyyətlərini təsdiqləyib. Onun sözlərinə görə, bu qərar administrasiyanın tarif siyasətini davam etdirməsi üçün hüquqi əsas yaradır.
Hələlik yeni rüsumların nə vaxt elan olunacağı ilə bağlı konkret tarix açıqlanmayıb.
Xatırladaq ki, ABŞ-nin Ali Məhkəməsi fevralın 20-də prezident administrasiyasının beynəlxalq fövqəladə iqtisadi səlahiyyətlər haqqında qanuna əsaslanaraq digər ölkələrə qarşı idxal rüsumları tətbiq etməsini səlahiyyət həddinin aşılması kimi qiymətləndirib. Eyni zamanda, məhkəmə əvvəllər rüsum kimi ödənilmiş vəsaitlərin geri qaytarılıb-qaytarılmaması məsələsinə aydınlıq gətirməyib.
Beləliklə, administrasiya Ali Məhkəmənin məhdudlaşdırıcı qərarından sonra tarif siyasətini fərqli hüquqi mexanizmlər vasitəsilə davam etdirməyə çalışır və yeni rüsumların tətbiqi ABŞ-nin ticarət münasibətlərinə əlavə təsir göstərə bilər.
Poliqon.info
