Çinli psixoloqlar müəyyən ediblər ki, “uzanıb qalmaq” həyat tərzini dəstəkləyən gənclər orta hesabla həyatlarından daha az məmnun olurlar. Üstəlik, məhz bu yanaşma zaman keçdikcə həyat məmnunluğunun azalacağını proqnozlaşdırır, əksinə deyil.
Redaktor.az xəbər verir ki, tədqiqat "Behavioral Sciences" jurnalında dərc olunub.
Tang ping fenomeni Çində sərt rəqabətə, karyera yarışına və maddi ambisiyalara passiv etiraz forması kimi yaranıb. Bu mövqeni seçən insanlar minimum ehtiyaclarla kifayətlənməyə, vəzifə artımı, mənzil və ya status uğrunda hər nəyin bahasına olursa-olsun mübarizədən imtina etməyə üstünlük verirlər. İfadə sözbəsöz “arxası üstə uzanmaq, heç nə etməmək və heç nəyə reaksiya verməmək” mənasını verir.
Hərəkat artıq iş yükü, mənzil qiymətlərinin yüksəkliyi, iqtisadi bərabərsizlik və “996” iş rejiminə (səhər 9-dan axşam 9-a qədər, həftədə altı gün işləmək) reaksiya kimi formalaşıb. Tang ping tərəfdarları emosional tükənmə və həddindən artıq səylərin gözəçarpan nəticə verməməsindən danışırlar.
Huanhua Lu və həmkarları “uzanıb qalmaq” yanaşmasının subyektiv rifahla necə əlaqəli olduğunu araşdırıblar. Birinci tədqiqatda Pekindən 960 tələbə (orta yaş təxminən 20) iştirak edib. Onların bir qismi nüfuzlu universitetdə, digər qismi isə adi kollecdə təhsil alırdı. İştirakçılar tang ping meylini və həyat məmnunluğunu ölçən sorğuları doldurublar.
Nəticələr göstərib ki, bu həyat tərzinə daha güclü dəstək həyat məmnunluğunun daha aşağı olması ilə əlaqəlidir – cins, yaş və sosial-iqtisadi status nəzərə alındıqdan sonra belə. Orta hesabla qadınlar və daha az nüfuzlu ali məktəbdə oxuyan tələbələr bu yanaşmanı daha çox dəstəkləyiblər.
İkinci tədqiqatda 109 tələbə eyni testləri bir ay fasilə ilə iki dəfə keçib. Təhlil göstərib ki, ilkin mərhələdə tang ping-i dəstəkləmək bir ay sonra həyat məmnunluğunun azalmasını proqnozlaşdırır. Əksinə, başlanğıcda həyat məmnunluğunun aşağı olması sonradan “uzanıb qalmaq” meylinin artmasına səbəb olmayıb.
Müəlliflər belə nəticəyə gəliblər ki, ambisiyalardan imtina qısamüddətli perspektivdə təzyiqi azaltmaq mexanizmi kimi çıxış edə bilər. Lakin uzunmüddətli dövrdə bu yanaşma psixoloji funksionallığın zəifləməsi ilə əlaqələndirilir.
Xədicə BAXIŞLI
