Hindistanın baş naziri qlobal liderlər arasında rekord göstəriciyə imza atıb...
Hindistanın baş naziri Narendra Modi sosial şəbəkə platforması Instagram-da 100 milyondan artıq izləyici toplayaraq dünya liderləri arasında bu həddi keçən ilk siyasətçi olub.
Poliqon xəbər verir ki, bu barədə Times of India nəşri məlumat yayıb.
Məlumata görə, Narendra Modi öz Instagram hesabını 2014-cü ildə yaradıb və ötən illər ərzində platformada fəallığını davamlı şəkildə artırıb. Hazırda o, izləyici sayına görə digər dünya siyasətçilərini əhəmiyyətli fərqlə qabaqlayır.
Statistik göstəricilərə əsasən, ABŞ-nin prezidenti Donald Trampın Instagram hesabında 43,2 milyon izləyici var. İndoneziya prezidenti Prabovo Subianto 15 milyon, Braziliya prezidenti 14,4 milyon, Türkiyə prezidenti Rəcəb Tayyib Ərdoğan isə 11,6 milyon izləyici ilə siyahıda növbəti yerləri tutur.
Narendra Modi təkcə beynəlxalq miqyasda deyil, ölkə daxilində də sosial şəbəkələrdə ən çox izlənilən siyasətçi mövqeyini qoruyur. Uttar-Pradeş ştatının baş naziri Yogi Adityanatın 16,1 milyon, müxalifət lideri Rahul Qandinin isə təxminən 12,6 milyon izləyicisi var.
Ekspertlərin fikrincə, Narendra Modinin sosial şəbəkələrdəki yüksək fəallığı və seçicilərlə birbaşa ünsiyyət strategiyası onun geniş auditoriya qazanmasında mühüm rol oynayır. O, platformada həm dövlət fəaliyyəti, həm beynəlxalq görüşlər, həm də şəxsi həyatına dair paylaşımlar edərək müxtəlif yaş qruplarını əhatə etməyə nail olur.
Qeyd edək ki, Instagram platforması Meta şirkətinə məxsusdur və qlobal miqyasda milyardlarla istifadəçiyə malikdir. Sosial şəbəkələr son illər siyasi kommunikasiya vasitəsi kimi getdikcə daha böyük əhəmiyyət qazanır və liderlərin ictimai rəyə təsir imkanlarını genişləndirir.
Poliqon.info
