Günəş 2022-ci ildən bəri ilk dəfə olaraq tamamilə ləkəsiz müşahidə edilib. Sonuncu dəfə onun diski 8 iyun 2022-ci ildə – 1 355 gündən çox əvvəl tam təmiz olmuşdu. Bu hal mövcud Günəş dövrünün daha sakit fazaya keçidini göstərə bilər...
Poliqon xəbər verir ki, bu barədə Space.com nəşri yazır.
Günəş ləkələri ulduzun səthində daha soyuq və tünd sahələrdir. Onlar istiliyin dərin qatlarından çıxmasına mane olan güclü maqnit sahələri səbəbindən yaranır. Maqnit xətləri qırıldıqda Günəş alışmaları və tac kütləsinin atılması baş verir. Bu isə Yer kürəsində geomaqnit qasırğalarına səbəb ola bilən sıx plazma axınları ilə müşayiət olunur.
Günəşin aktivliyi təxminən hər 11 ildən bir dəyişir. Maksimum dövrdə ləkələr demək olar ki, daim görünür və alışmalar hər gün baş verə bilər. Minimum mərhələdə isə ulduz aylarla ləkəsiz qala bilər. Hazırkı 25-ci dövr 2024-cü ildə pik həddə çatıb.
Məlumata görə, təmiz vəziyyət cəmi iki gün davam edib və fevralın 24-də alimlər yeni aktiv sahənin formalaşdığını qeydə alıblar. Eyni zamanda, bəzi ləkələrin Günəşin Yer kürəsindən görünməyən tərəfində yerləşməsi ehtimalı da istisna edilmir.
Ləkələrin sayının azalması aktivliyin tədricən zəiflədiyini göstərsə də, növbəti Günəş minimumunun 2030-cu ildən tez baş verməsi gözlənilmir. Əvvəlki minimum mərhələsində – 2018-2020-ci illərdə Günəş ümumilikdə təxminən 700 gün ləkəsiz qalmışdı. Hazırda isə söhbət yalnız qısa fasilədən gedir və alışmaların və qütb parıltılarının uzunmüddətli azalması barədə nəticə çıxarmaq hələ tezdir.
Poliqon.info
