"Əl-Nəsr"in və Portuqaliya millisinin hücumçusu Kriştianu Ronaldu İspaniyanın "Almeriya" klubunun səhmlərinin 25 faizini satın alıb.
Fanat.Az xəbər verir ki, məlumatı AS yayıb.
"Almeriya" İspaniyanın aşağı liqasında çıxış edir və La Liqaya yüksəlməyi hədəfləyir.
Nəşr Ronaldunun və "Almeriyanın prezidentinin sövdələşmə ilə bağlı fikirlərini də təqdim edib.
"Mən həmişə meydandan kənarda futbola töhfə verməyə çalışmışam. "Almeriya" möhkəm təmələ və aydın inkişaf potensialına malik bir klubdur. Klubun rəhbərliyi ilə onun inkişafının növbəti mərhələsini dəstəkləmək üçün işləmək imkanına sahib olduğum üçün çox şadam. Sərmayə idman sektorundakı investisiyalarımı birləşdirmək və idarə etmək üçün yaradılan "CR7 SA"-nın törəmə şirkəti olan "CR7 Sports Investments"-ə inteqrasiya olunacaq. "CR7 Sports Investments" peşəkar idmanda strateji imkanların qiymətləndirilməsi və həyata keçirilməsi üçün vasitə kimi çıxış edəcək", - 41 yaşlı superulduz belə deyib.
"Almeriya"nın prezidenti Məhəmməd Əl-Xereyci isə bu barədə belə danışıb:
"Kriştianunun klubumuza investisiya qoymağı seçməsindən məmnunuq. O, bütün dövrlərin ən yaxşı oyunçusu hesab olunur, İspaniya liqaları haqqında əla məlumata malikdir və burada həm komanda, həm də akademiya baxımından qurduğumuz şeylərin potensialını başa düşür".
