Birləşmiş Ərəb Əmirliklərində yeni evlənən cütlüklərə 70 min dirhəm (təxminən 32 min manat) məbləğində dəstək verilməsi müzakirələr yaradıb.
Ölkə.Az xəbər verir ki, proqramın əsas şərti pul deyil, ailə həyatı ilə bağlı məcburi kurs və mühazirələrdə iştirakdır. Gənclərə sadəcə nikaha daxil olmaq yox, birlikdə yaşamağı öyrənmək təklif olunur.
Bu təşəbbüsə bəziləri praqmatik yanaşır: dövlət demoqrafiyanı stimullaşdırır. Amma psixoloji baxımdan yanaşdıqda, burada daha incə mesaj var – evlilik “qaranlığa atılan addım” deyil, hazırlıq tələb edən yeni həyat mərhələsidir.
Bu model müəyyən mənada sovet dövrünü xatırladır. SSRİ-də nikah üçün müraciət etdikdən sonra gənclərə “novobraçnı” mağazasına dəvət verilirdi. Bir ay ərzində yeni ailə üçün zəruri əşyalar almaq mümkün olurdu. Bu, sadəcə alış-veriş deyildi – ailəvi ritual idi. Yaxınlar dəstək olur, gənc cütlük isə psixoloji olaraq yeni rolu “üzərinə geyinirdi”.
Sosial psixologiyada buna “qapıda ayaq” mexanizmi deyilir: insan əvvəl kiçik bir öhdəliyi qəbul edir, sonra daha böyüyünü daşımaq asanlaşır. Bu manipulyasiya deyil, təşvişin azaldılmasıdır. Kiçik və anlaşılan addımlar psixikanın qaçmasının qarşısını alır.
Əmirliklərdə isə proses daha sistemlidir: cütlük 6 ay ərzində 12 moduldan ibarət Eddad proqramında iştirak edir – münasibətlər, maliyyə, ailə, valideynlik kimi mövzular tədris olunur. Bu, ailəyə uzunmüddətli psixoloji və praktiki hazırlıq deməkdir.
Bu gün sürət əsrində insanlar 30 yaşa çatanda sanki qəfil oyanır: “Az əvvəl məktəbdə idim, indi isə ailə qurmaq vaxtıdır”. Psixoloq konsultasiyalarında tez-tez eşidilən cümlə budur: “Bir-birimizi sevirik, amma qorxuruq – birdən hər şey dağılar”.
Məhz buna görə əsas məsələ məbləğ deyil, siqnaldır. Cəmiyyət və dövlət deyir: münasibət təkcə ehtiras deyil, həm də birgə layihədir.
Ehtiras sönə bilər. Amma uzunömürlü ailə münasibətləri ortaq ritual, sakit gündəlik həyat, qarşılıqlı dəstək və münaqişələri dağıtmadan həll etmə bacarığı üzərində qurulur.
Ailə qurmaq risk deyil, öyrənilə bilən proses kimi təqdim olunanda insanlar ilk məişət toqquşmasında qaçmır.//Musavat.com
