Çində kran istehsal edən şirkətin rəhbəri Cui Peijun işçilərinə təxminən 26 milyon dollar nağd bonus paylayıb. Metbuat.az xəbər verir ki, o, pulları masalara yığaraq işçilərinə "Apara biləcəyiniz qədər götürün" deyib. Şirkət rəhbərinin görünməmiş mükafatlandırma sistemi maraqla qarşılanıb. Məlumata görə, şirkət təxminən 7000 işçi üçün 800 ziyafət masasını ümumilikdə 26 milyon dollar nağd pulla doldurub. Rəhbərlik işçilərə "Siz buna layiqsiniz" deyərək onları təqdir edib. Dəbdəbəli mərasimdə kostyum geyinmiş işçilər böyük əskinas yığınlarının ətrafına toplaşaraq evlərinə bir neçə qucaq nağd pul aparıblar. Şirkət rəsmiləri bu təcrübənin ayrı-seçkilik olmadan bütün işçilər üçün açıq olduğunu vurğulayıblar. Bildirilir ki, Cui Peijunun xeyriyyəçilik yanaşması onun çətin keçmişindən qaynaqlanır. Ailəsinin maliyyə çətinlikləri səbəbindən təhsilini yarımçıq qoymaq məcburiyyətində qalan iş adamı "yoxsulluq gələcək nəsillərə miras kimi ötürülməməlidir" fəlsəfəsi ilə fəaliyyət göstərir. O, yalnız işçilərini dəstəkləməklə kifayətlənməyib, həm də minlərlə aşağı gəlirli universitet tələbəsinə 4,7 milyon dollar ianə edərək onların təhsilini dəstəkləyib.
