Meta şirkəti yeni bildiriş sisteminin yaxın həftələrdə bir neçə ölkədə tətbiq olunacağını açıqlayıb...
Poliqon xəbər verir ki, Meta şirkəti Instagram platformasında yeniyetmələrin intihar və ya özünə xəsarət yetirmə ilə bağlı məzmunu davamlı şəkildə axtarması halında valideynlərə bildiriş göndəriləcəyini açıqlayıb. Yeni mexanizm yaxın həftələrdə ABŞ, Böyük Britaniya, Avstraliya və Kanadada istifadəyə veriləcək.
Məlumata görə, bildirişlər yeniyetmənin qısa zaman ərzində bu kimi açar sözlərlə təkrar axtarış etməsi halında aktivləşəcək. Sistem xüsusilə israrlı və ardıcıl axtarışları müəyyən etmək üçün nəzərdə tutulub. 2026-cı ilin sonunadək funksiyanın digər regionlara da şamil ediləcəyi planlaşdırılır.
Valideyn nəzarəti alətlərindən istifadə edən şəxslər elektron poçt, qısa mesaj, WhatsApp və ya birbaşa tətbiq daxilində xəbərdarlıq alacaqlar. Bununla yanaşı, onlara övladları ilə çətin mövzular barədə danışmağa kömək edəcək mütəxəssis mənbələr və tövsiyələr də təqdim olunacaq.
Qeyd edək ki, Instagram artıq intihar və özünə xəsarət yetirmə ilə bağlı açar sözlər üzrə birbaşa axtarış nəticələrini bloklayır və istifadəçiləri dəstək xidmətlərinə yönləndirir. Yeni bildiriş mexanizmi isə mövcud məhdudiyyətlərə baxmayaraq, yeniyetmələrin bu məzmunu davamlı şəkildə axtarmağa çalışdığı halları aşkar etməyə yönəlib.
Meta şirkəti bildirib ki, xəbərdarlıq həddinin müəyyənləşdirilməsi zamanı intihar və özünə zərər mövzuları üzrə məsləhətçi qrupla məsləhətləşmələr aparılıb. Şirkət ehtiyatlı yanaşmanı üstün tutduğunu, bəzi hallarda real təhlükə olmasa belə bildirişlərin göndərilə biləcəyini qeyd edib.
Bu addım Meta platformalarının gənclər tərəfindən istifadəsi ilə bağlı artan hüquqi və ictimai təzyiqlər fonunda atılır. Son illər sosial şəbəkələrin yeniyetmələrin psixoloji sağlamlığına təsiri ilə bağlı müzakirələr və məhkəmə iddiaları intensivləşib.
Poliqon.info
