Xocalı Soyqırımı Memorial Kompleksinin açılışı Azərbaycan dövlətinin tarixi ədalətə sadiqliyinin parlaq təcəssümü oldu. Prezident İlham Əliyev çıxışında həm faciənin miqyasını, həm də bu faciədən sonra keçilən mürəkkəb və şərəfli yolu ətraflı şəkildə şərh etdi. Xocalı soyqırımı yalnız Azərbaycan xalqına qarşı deyil, bütün insanlığa qarşı törədilmiş cinayət kimi qiymətləndirildi. Qətlə yetirilmiş yüzlərlə mülki şəxs, o cümlədən qadın və uşaqlar bu vəhşiliyin miqyasını göstərir. Prezident İlham Əliyev vurğuladı ki, bu cinayətin məsuliyyəti Ermənistan dövlətinin üzərinə düşür. Çıxışda xüsusi olaraq qeyd edildi ki, Xocalı həqiqətlərinin dünyaya çatdırılması sistemli və davamlı fəaliyyət nəticəsində mümkün olmuşdur. Bu istiqamətdə Heydər Əliyev Fondunun rolu danılmazdır. Fondun təşəbbüsü ilə həyata keçirilən “Xocalıya ədalət!” kampaniyası beynəlxalq miqyasda diqqət çəkmişdir. Kampaniyanın ideya müəllifi Heydər Əliyev Fondunun vitse-prezidenti Leyla Əliyeva uzun illər ərzində müxtəlif ölkələrdə Xocalı həqiqətlərini ardıcıl şəkildə təbliğ etmişdir. Prezident bildirdi ki, əgər Azərbaycan öz haqq səsini ucaltmasaydı, bu gün dünya ictimaiyyəti Xocalı ilə bağlı obyektiv məlumat əldə edə bilməzdi. Ermənistanın və onu dəstəkləyən dairələrin təbliğatına baxmayaraq, Azərbaycan həqiqətləri beynəlxalq aləmdə qəbul olunmağa başlamışdır. Çıxışın mühüm hissəsi 2020-ci il Vətən Müharibəsinə və 2023-cü il antiterror əməliyyatına həsr olundu. Prezident İlham Əliyev qeyd etdi ki, Azərbaycan heç vaxt işğalla barışmayacağını dəfələrlə bəyan etmişdi. Diplomatik danışıqlar nəticə vermədikdə, dövlət öz ərazi bütövlüyünü hərbi yolla bərpa etdi. 44 günlük müharibə nəticəsində düşmən kapitulyasiya aktına imza atdı. Lakin proses bununla bitmədi. 2023-cü ildə keçirilmiş qısa müddətli antiterror əməliyyatı qanunsuz silahlı birləşmələrin ləğv olunması və dövlət suverenliyinin tam təmin edilməsi ilə nəticələndi. Prezident İlham Əliyev xüsusi olaraq vurğuladı ki, dünyada nadir hallarda rast gəlinir ki, bir dövlət həm tam və mütləq hərbi qələbə qazansın, həm ərazi bütövlüyünü tam bərpa etsin, həm də müharibə cinayətkarlarını məhkəmə qarşısına çıxarsın. Azərbaycan bunu bacardı. Memorial Kompleksin açılışı məhz bu proseslərin məntiqi nəticəsi kimi qiymətləndirildi. İki il əvvəl təməli qoyulan kompleksin məhz Xocalıda ucaldılması ədalətin təntənəsidir. Prezident İlham Əliyev bildirdi ki, bu layihə əvvəl Bakıda həyata keçirilə bilərdi, lakin daxili inam onu Xocalı torpağında reallaşdırmağa sövq etdi. Bu gün Azərbaycan güclü dövlətdir. Prezident İlham Əliyev çıxışında vurğuladı ki, artıq heç kim Azərbaycanı təzyiqlərlə, hədələrlə yolundan döndərə bilməz. İşğal dövründə yayılan şayiələr, təzyiqlər və “reallıqla barışmaq” çağırışları nəticəsiz qaldı. Azərbaycan iqtisadi cəhətdən müstəqil, siyasi baxımdan qətiyyətli və hərbi baxımdan güclü dövlətə çevrildi. Güclü ordu quruldu, beynəlxalq tərəfdaşlıqlar genişləndirildi, hüquqi baza möhkəmləndirildi. Prezident İlham Əliyev bir daha vurğuladı ki, Azərbaycan müharibəni beynəlxalq hüququn normalarına uyğun aparmışdır. Mülki əhaliyə qarşı heç vaxt məqsədli əməliyyat aparılmamışdır. Bu, xalqın mənəvi üstünlüyünü və humanist dəyərlərə bağlılığını göstərir. Xocalı sakinlərinin açılış mərasimində iştirakı isə tarixi ədalətin canlı şahidliyidir. Uzun illər doğma yurd həsrəti ilə yaşayan insanlar bu gün öz torpaqlarında ucaldılan memorialın açılışında iştirak edirlər. Bu, dövlət-vətəndaş birliyinin ən parlaq nümunəsidir. Memorial Kompleks Azərbaycan xalqının kollektiv yaddaşının daşlaşmış ifadəsidir. Bu abidə gələcək nəsillərə bir mesajdır: tarix unudulmur, ədalət gec də olsa təmin olunur və güclü dövlət hər zaman öz xalqının haqqını qorumağa qadirdir. Beləliklə, Xocalı Soyqırımı Memorialının açılışı milli birliyin, siyasi iradənin və tarixi ədalətin təntənəsidir. Bu hadisə göstərdi ki, Azərbaycan xalqı əyilməzdir, dövlət isə öz vətəndaşlarının hüquqlarını bərpa etməyə qadir və qətiyyətlidir.
Şahin Seyidzadə
Milli Məclisin deputatı
