Oxu.az saytından verilən məlumata görə, ain.az xəbər verir.
Kubra Məhərrəmova yazır...
Dünən gecə saatlarında sosial mediaya mənim "video və fotoşəkillərim" yayıldı. Telefonum isə zəng və mesajlardan dolub daşdı. Qərar verdim ki, cavab verməyim. Anladım ki, bir adamı məhv etmək üçün üç saniyəlik video və bir fotoşəkil bəs edir. Bu gün sosial şəbəkələr, trol orduları, bot fabrikləri elə bir səviyyəyə gəlib çıxıb ki, tülkü tülkülüyünü sübut edənə kimi, dərisi boğazından çıxır. Artıq elə bir dövrdəyik ki, nəinki eşitdiyinə, artıq gördüyünə də inanmaq olmaz. Hər şeyi düzüb-qoşmaq mümkündür. Bir az vaxt aparır, amma mümkünsüz deyil. İllərdir qadınların bəzi şəxslər tərəfindən alçaldılmasının şahidi oluruq. Bu, bəzən ailə daxilində, bəzən təhsil ocaqlarında, qısaca hər yerdə baş verir.
Hər gördüyünüzə inanmayın! - VİDEO
Döyülən, söyülən, hətta öldürülən qadınların bir ortaq cəhəti var. Onların yaxınlarına hansısa sözü, şayiəni çatdırıblar. Bir şayiə, bir söz və sonu ölüm. Bu gün bir daha demək istəyirəm ki, qadının üstünə istənilən ad yapışır. Sadəcə, indi bunu "sübut" etmək üçün daha inandırıcı alətlər var. Süni intellekt alətləri hər şeyə qadirdir. Dünən yaşana biləcək bütün hadisələri gözə alıb sosial eksperimentə getdim. Bunu gənc, yeniyetmə qızlarımız üçün etdim. Etdim ki, qorxmasınlar, etdim ki, gözləri açılsın. Onları kimsə şantaj və təhdid edəndə təslim olmasınlar. Ən vacibi, axı siz özünüz həqiqəti bilirsiniz. Sizə bir video və ya fotoya görə inanmayacaq, sizi qınayacaq insanlar varsa, onları indidən həyatınızdan çıxarın. Çünki çətin məqamda yanınızda olmayacaq insanlar, yaxşı gününüzdə də lazım deyil. Biz bu fədakarlığa, riskə ona görə getdik ki, gələcəkdə heç kim bu "deepfake"lərdən əziyyət çəkməsin. İnsanlar anlasınlar ki, bunu hər kəs sizə qarşı edə bilər. Qisas, pul, bəzən isə sadəcə kimisə məhv etmək üçün.
* Kubra Məhərrəmovanın görüntüləri: Dipfeyklər necə yarandı? - VİDEO - FOTO
Məsələni detallı yazıram. Dünyada məşhur olan "Reface" tətbiqinin prodüseri Polina Kovalevskaya ilə canlı bağlantı zamanı eksperiment elədik. Mənim foto və videolarım süni intellekt alətləri ilə tələb olunan hala gətirildi. Şərti olaraq "əxlaqsız" qadın obrazı yaradıldı. İçki içir, siqaret çəkir. Cəmiyyət üçün trigger və qınaq olunacaq obraz. Hətta istəsəydik, bu "fake Kubra" tam çılpaq, yarıçılpaq da yaradıla bilərdi. Hər şey istəyə və ödənilən pula görə dəyişir. Sanki rəssama pul ödəyirsən ki, sevgilimin rəsmini belə çək. O rəssam da indi süni intellektdir. Bu gün "deepfake" elə səviyyəyə çatıb ki, artıq ekspertlər belə realı saxtadan ayıra bilmirlər. Biz getdikcə sərhədləri pozulan, üfüqləri müəyyən olunmayan dünyada yaşayırıq. Əvvəl deyirdilər hər eşitdiyinə inanma, indi isə hər gördüyümüzə inanmamalıyıq. Çünki artıq istənilən görüntünün kiminsə evini yıxacaq səviyyədə düzəldilməsi mümkündür. Adicə sosial şəbəkələrdəki effekt və maskalar süni intellekt qiyamətinin ilk işartılarıdır. Bir də düşünün ki, bunu peşəkarlar edirlər. Hər detalı işləyirlər. İşıq və kölgəni müəyyən edirlər. Süni intellekt hər gün daha bir yenilik öyrənir və tətbiq edir. Bir valideyn kimi ana-atalara səslənirəm, uşaqlarımız dünyanın ən qəddar dövrünə təsadüf edib. Onları problemləri ilə tək qoymayın. Heç kimin fikri, düşüncəsi övladınızdan daha vacib ola bilməz. Sonda isə zəng edib, mesaj yazan, sosial şəbəkələrdə dəstək olan hər kəsə təşəkkür edirəm. Hər sözünüzlə məni ruhlandırdınız. Özünüzü və balalarınızı qoruyun!
Daha ətraflı məlumat və yeniliklər üçün ain.az saytını izləyin.
