Dünən Parisdə "Olimpiya" konsert zalının səhnəsində "Sezar" mükafatının 51-ci təqdimetmə mərasimi keçirilib. Oxuməni.az xəbər verir ki, bu barədə "rfi.fr" məlumat yayıb.
Keçən ilin ən yaxşı filmi Kətrin Taryenin "Bağlılıq" filmi seçilib, ən yaxşı rejissor mükafatını isə Riçard Linkleyter "Yeni dalğa" filminə görə alıb.
Ümumilikdə, Kətrin Taryenin "Bağlılıq" filmi üç mükafat qazanıb: "Ən yaxşı film", "Ən yaxşı ikinci plan aktrisası" (Vimala Pons) və "Ən yaxşı adaptasiya". Mərasimin qalibi olan filmdə kitab mağazası sahibi Sandra haqqında bəhs edilir. Sandra, anası doğuş üçün xəstəxanaya getməli olduqda altı yaşlı Elliotla qalmağa razılaşır. Elliotun anası ölür və Sandranın həyatı yetim qalmış oğlanın və atasının taleyi ilə qovuşur.
Riçard Linkleyterin "Yeni dalğa" filmi Jan-Lük Qodarın "Son nəfəsdə" filminin çəkilişləri haqqında fransız kinosuna həsr olunmuş bir hörmət filmidir. Filmin premyerası Kann festivalında baş tutub. Linkleyter ən yaxşı rejissor mükafatını alıb. Film həmçinin "Ən yaxşı operator işi" (Devid Şambil), "Ən yaxşı montaj" (Kərtin Şvarts) və "Ən yaxşı kostyumlar" (Paskalin Şavan) nominasiyalarında qalib gəlib.
Ən yaxşı xarici film kimi Pol Tomas Andersonun " Döyüş döyüşə qarşı" filmi seçilib. Bu film həmçinin "Oskar" mükafatının əsas namizədlərindən biri hesab olunur. Kinematoqrafa verdiyi töhfələrə görə fəxri "Sezar" mükafatını Cim Kerri alıb.
Mərasimin əvvəlində onun sədri Kamil Kotte mükafatı "azadlıq uğrunda mübarizə aparan bütün dünya xalqlarına" həsr edib. Qırmızı xalçada qonaqların bir hissəsi iran xalqı ilə həmrəylik əlaməti olaraq nişanlarla çıxıb.
Fransız-iran əsilli aktrisa Qolşifte Fərəhani, ən yaxşı orijinal ssenari mükafatını təqdim edərkən, "on illərdir azadlıq uğrunda mübarizə aparan İran xalqına" hörmət əlaməti olaraq qara paltarda səhnəyə çıxıb. Salonda həmçinin Kann festivalının "Qızıl palma" mükafatı laureatı, "Sadə təsadüf" filminin rejissoru iranlı Cəfər Pənahi də iştirak edib.
Mərasim zamanı keçən ilin dekabrında vəfat etmiş əfsanəvi fransız aktrisası Bricit Bardonun xatirəsi anılıb.
Almaz Həsənli
