Ukrayna daxili neft hasilatını Avropaya ixrac etmək məqsədilə "Drujba" boru kəmərindən yararlanıb.
"Reuters" agentliyinin öz mənbələrinə istinadən verdiyi məlumata görə, tədarüklər dayandırılana qədər Kiyev hər ay bu kəmər vasitəsilə təxminən 40 min metrik ton neft nəql edib. Digər mənbələr də ixrac faktını təsdiqləsələr də, dəqiq həcmlər barədə məlumat verməyiblər.
Agentlik qeyd edir ki, "Drujba" kəməri ilə Macarıstan və Slovakiyaya neft nəqlinin dayandırılması Ukraynanı büdcə kəsirini qapatmaq üçün zəruri olan gəlir mənbəyindən məhrum edir. Mənbələrin iddiasına görə, vəziyyət dəyişməz qalsa, bu, Kiyevi ölkədə neft hasilatını tamamilə dayandırmağa məcbur edə bilər.
Məlumata görə, münaqişə başladıqdan sonra Ukraynanın öz neft emalı zavodlarının fəaliyyəti dayandığı üçün "Drujba" boru kəməri xammal ixracı üçün yeganə əlçatan marşrut olub. Yanvarın 27-dən bəri "Drujba" vasitəsilə Macarıstana neft çatdırılmır.
Bununla əlaqədar fevralın 15-də Macarıstan və Slovakiya Xorvatiyaya müraciət edərək Rusiya xammalının Adriatik boru kəməri ilə tranzitinə icazə istəyiblər. Planlaşdırılır ki, neft dəniz yolu ilə Xorvatiyanın Omişal limanına çatdırılacaq.
Eyni zamanda, Macarıstan hökuməti MOL şirkətinin neft emalı zavodları üçün dövlət ehtiyatlarından 250 min ton neft ayırıb ki, bu həcm də üç aylıq tələbatı ödəməyə kifayət edir.
