Slovakiya Baş naziri Robert Fitso "X" sosial şəbəkəsində Ukrayna Prezidenti Volodimir Zelenski ilə görüşmək barədə razılığa gəldiyini bildirib.
Siyasətçi bildirib ki, Ukrayna lideri bu görüşdə ikitərəfli əməkdaşlığın aspektlərini müzakirə etməyi təklif edib. Fitso Xarici İşlər Nazirliyinə və Slovakiya hökumətinin dəftərxanasına uyğun tarix seçməyi tapşırıb.
“Mən Ukrayna Prezidenti ilə görüşü onun tez-tez ziyarət etdiyi Avropa İttifaqına üzv dövlətlərdən birinin ərazisində keçirməyə üstünlük verirəm”, — deyə Baş nazir yekunlaşdırıb.
Bundan əvvəl Zelenski “Drujba” neft kəmərində təftiş aparılması təklifini qəbul etməmişdi. Fitso isə Ukraynanın “Drujba” kəməri ilə neft nəqlinin qeyri-mümkünlüyü barədə bəyanatlarının doğruluğuna şübhə ilə yanaşmışdı. Baş nazirin sözlərinə görə, Bratislavanın əlində hər hansı maneənin olmadığına və boru kəmərinin bütövlüyünə dair məlumatlar var.
Yanvarın sonunda Ukrayna “Drujba” neft kəməri ilə tranziti dayandıraraq Slovakiya və Macarıstanı Rusiya tədarükündən məhrum etmişdi. Səbəb kimi ölkənin qərb hissəsində atəşlər nəticəsində avadanlığın zədələnməsi göstərilmişdi. Tranzitin fevralın 20-də bərpa olunması planlaşdırılsa da, bu baş verməyib.
