“Milli Məclisin vitse-spikeri Rafael Hüseynovun dövlət qurumlarının adlarını Azərbaycan türkcəsinə uyğunlaşdırmaq niyyəti var. Bu, müsbət sayıla bilər. O, Türkiyənin Böyük Millət Məclisini nümunə olaraq gətirir. Türkiyədə "Millət Məclisi"ndən əvvəl "Böyük" sözü var. "Milli" sözü də, "Məclis" sözü də istər Türkiyədə, istərsə də bizdə ərəb dilindədir. Buna şəkilçi artırmaqla əsl mahiyyəti dəyişmir. Yenə də millətin məclisi olur, sözün kökü ərəb dilində qalır. Düşünürəm, belə olan halda sözün kökü də dəyişilməlidir. Ulus, qurultay, yığıncaq... Daha yaxşısını Rafael müəllim, dilçilər bilər..."
Bu sözləri Pravda.az-a açıqlamasında sabiq deputat Tahir Kərimli deyib.
O bildirib ki, Milli Məclisin adının dəyişdirilməsi üçün Konstitusiyaya dəyişiklik edilməlidir: “Konstitusiyada parlamentin adı "Milli Məclis" gedir. Konstitusiyada dəyişiklik olmadan digər qanunvericilik aktlarında dəyişiklik etmək mümkün deyil. Hər halda təklifdir. Məsələn, "Azərbaycan Respublikası" adını bərpa etdilər. 1991-ci ildə Ali Sovetdəki çıxışımda təklif etdim ki, dövlətin adını "Şimali Azərbaycan" qoyaq, amma qəbul olunmadı. Dedim ki, belə nümunələr Koreya və digərlərində var. Dedilər ki, söz artırmaq mahiyyəti dəyişmir, biz 1918-ci ilin adını davam etdirməliyik. Əslində, 1918-1920-ci illərdə dövlətin adı "Azərbaycan Xalq Cümhuriyyəti" adlanırdı. Sonda "Azərbaycan Respublikası" kimi qəbul edildi. Yəni uşağa da adı doğulanda qoyulur. Sonradan dəyişmək çətindir. Dövlət qurumu, yaxud hansısa orqan yaradılanda əvvəldən bu adı qoysadıq, daha doğru olardı. Vaxtında Milli Məclisin adını Millət Məclisi qoysaydıq, indi bu cür çətinliklərlə rastlaşmazdıq".
Aytəkin Qardaşova
