Əli Xameneinin ölümündən sonra varislik prosesi sürətlə həyata keçiriləcək...
Poliqon xəbər verir ki, bu barədə ISNA Agentliyi məlumat yayıb. İran rəsmiləri Əli Xameneinin ölümündən sonra yeni Ali Liderin seçilməsinin uzun çəkməyəcəyini bildiriblər. Bu açıqlama ilə Ekspertlər Assambleyasının üzvü ayətullah Əli Mualemi çıxış edib.
Əli Mualemi qeyd edib ki, Ekspertlər Assambleyası rəhbər seçimi zamanı şəxsi maraqları və ya siyasi, partiya meyillərini nəzərə almayacağına dair and içib. Onun sözlərinə görə, seçim dini meyarlara və üzvlərin müstəqil mülahizələrinə əsaslanacaq, buna görə də narahatlığa əsas yoxdur. O vurğulayıb ki, qərar tam şəkildə şəriət prinsiplərinə uyğun veriləcək.
Əli Xamenei 36 il ərzində İran İslam Respublikasına rəhbərlik edib. O, 28 fevral tarixində ABŞ-nin və İsrailin İrana endirdiyi zərbələr zamanı həlak olub. İsrail Müdafiə Qüvvələrinin məlumatına görə, ayətullahın iqamətgahına təxminən 30 bomba atılıb. İranın xarici işlər naziri Abbas Əraqçi yeni Ali Liderin iki gün ərzində seçilə biləcəyini istisna etməyib.
İranda Ali Lider Ekspertlər Şurası tərəfindən seçilir. Bu qurum səkkiz il müddətinə xalq tərəfindən seçilən 88 müctəhiddən, yəni ali islam hüquqşünas-bogoslovlardan ibarətdir. Şuranın fövqəladə hallarda rəhbərin seçilməsi üçün daimi fəaliyyət göstərən xüsusi operativ qrupu mövcuddur. Gözlənilməz vəziyyətlərdə həmin qrup dərhal toplanaraq namizədlərin müzakirəsinə başlayır.
Analitiklər hesab edirlər ki, mövcud geosiyasi gərginlik və daxili sabitlik məsələləri nəzərə alınaraq, rəhbərlik postuna seçiləcək şəxs ölkənin həm siyasi kursunu, həm də beynəlxalq münasibətlərini müəyyən edəcək əsas fiqur olacaq.
Poliqon.info
