ABŞ–İsrailin İrana qarşı müharibəsinin üçüncü günündə itkilərin sayı artmaqda davam edir, Tehran və ölkənin qərb əyalətlərində zərbələr intensivləşir. Martın 2-si 2026-cı il, saat 17:00-a (ET) olan məlumata görə, HRANA son 24 saat ərzində 13 əyalətdə azı 56 hadisə qeydə alıb. Nəticədə ümumilikdə 101 nəfər (həlak olan və yaralanan, mülki və hərbi) zərər çəkib. Bildirilir ki, bütün rəqəmlər və təsnifat ilkin xarakter daşıyır və əlavə məlumatlar əldə olunduqca yenilənə bilər.
Təsdiqlənmiş məlumatlara əsasən, 85 mülki şəxs həlak olub, 5 mülki şəxs yaralanıb, həmçinin 11 hərbi qulluqçu ölüb. Son 24 saat ərzində 579 ölüm və yaralanma faktı isə hələ də yoxlanılma və təsnifat mərhələsindədir. Bu hallarda zərərçəkənlərin mülki və ya hərbi statusu dəqiqləşdirilir.
Bundan əlavə, son sutka ərzində 28 obyektin zərbəyə məruz qaldığı bildirilir. Həmin obyektlər arasında bir neçə hərbi baza, iki yaşayış məntəqəsi və Bəndər-Abbas şəhərində yerləşən Şəhid Bahonar limanı da var. Obyektlərin xüsusi mühafizə statusuna malik olub-olmaması, mülki, hərbi və ya ikili təyinatlı olması məsələsi hələ də araşdırılır və əlavə məlumatlara əsasən yenidən qiymətləndirilə bilər.
Münaqişənin 28 fevral 2026-cı ildə başlanmasından bu günədək olan ümumi göstəricilərə əsasən, mülki şəxslər arasında ölənlərin sayı 742 nəfərə çatıb. Onlardan 176-sı 18 yaşadək uşaqlardır. Hazırda 624 ölüm faktı isə təsdiqlənmə və təsnifat mərhələsindədir. Fevralın 28-dən bəri yaralanan mülki şəxslərin sayı 971 nəfərdir ki, onların 115-i uşaqlardır.
Hesabatda qeyd olunur ki, təqdim edilən məlumatlar son 24 saat ərzində sənədləşdirilmiş hadisələrin ilkin təhlilinə əsaslanır. Təsdiqləmə prosesi davam etdikcə, ölən və yaralananların sayı, onların mülki və ya hərbi statusu, eləcə də zərər görmüş obyektlərin kateqoriyası yenilənə bilər.
HRANA məlumatların yoxlanılması üçün sahə hesabatları, yerli mənbələr, tibbi və təcili yardım qurumları, həmçinin açıq mənbələr üzrə materialların qarşılıqlı yoxlanılması metodologiyasından istifadə etdiyini bildirir. Dəqiqləşdirilə bilməyən hallar “müəyyən edilməmiş” kimi təsnif edilir və araşdırma davam etdirilir. Mövcud vəziyyətin dinamikliyi, bölgələrə çıxış məhdudiyyətləri və rabitə problemləri məlumatların tamlığına təsir göstərə bilər.
