ain.az, Redaktor.az saytına istinadən bildirir.
"İranın Naxçıvana dron zərbəsi endirməsi istənilən halda birmənalı şəkildə pislənilən bir hadisə kimi dəyərləndirilir".
Bunu Redaktor.az-a açıqlamasında Milli Məclisin deputatı Azər Allahverənov bildirdi.
"Bu gün məlumdur ki, İran qonşu ölkələrlə münasibətdə, xüsusilə son 2-3 gündə baş verən amansız, qarşılıqlı raket hücumları fonunda hər zaman bildirir ki, mənim üçün potensial təhlükə olan ölkələrdə ABŞ-yə məxsus hərbi bazalar varsa, onlar mənim legitim hədəflərimdir. Baxmayaraq ki, həmin hərbi bazalar faktiki olaraq həmin ölkələrin ərazisində fəaliyyət göstərir, İran üçün onlar sırf legitim hədəf kimi qiymətləndirilir.
Belə bəyanatlar fonunda başa düşmək çətindir ki, bu zərbə hansı səbəblərdən endirilib. Çünki Azərbaycanın ərazisində hərbi baza yoxdur və Azərbaycanın ərazisi heç bir zaman İrana qarşı potensial təhlükə yaratmayıb. Xüsusilə də əgər söhbət Naxçıvan Beynəlxalq Hava Limanından gedirsə, bu mülki bir obyektdir və hal-hazırda İsrail-İran müharibəsi fonunda əcnəbilərin tez bir zamanda təyinat ünvanına çatdırılması məqsədilə fəaliyyət göstərən bir strukturdur. Bu obyektin mülki obyekt olaraq hədəf alınması kifayət qədər çox sual doğurur. Bunu cavablandırmaq isə olduqca çətindir", - o dedi.
Millət vəkili əlavə etdi ki, İrandan təkzib gələ bilər, amma bu bir dron deyil ki, təsadüf nəticəsində baş versin:
"Beş dronun eyni istiqamətdə yönləndirilməsi məqsədyönlü hərbi tapşırığın yerinə yetirildiyini göstərir. Əgər dronlar daha böyük partlayıcı silahlarla təmin olunsaydı, faciənin miqyası böyük olardı. Azərbaycan ərazisinin hədəf seçilməsinin səbəbləri barədə Azərbaycanın Xarici İşlər Nazirliyi və Müdafiə Nazirliyinin bəyanatları qarşı tərəfi, yəni İranı açıqlama verməyə məcbur edir. Digər tərəfdən, bir gün əvvəl Türkiyə ərazisinə raket zərbəsi endirilməsi barədə məlumatlar da var idi ki, türk hava hücumundan müdafiə sistemləri onu zərərsizləşdirmişdi. Bu da İran tərəfindən təkzib edilmişdi. Bu hadisələr təsadüfi deyil. Burada hərbi məqsədlər üçün istifadə olunan dronlardan söhbət gedir. Onlara koordinatların verilməsi, idarə edən qüvvələr və digər məsələlər hərbi reqlament çərçivəsində həyata keçirilir. Bu baxımdan hadisə təsadüfi sayıla bilməz".
Müsahibimizin sözlərinə görə, Azərbaycan tərəfi isə belə hadisələr fonunda müəyyən mesaj verir.
"Azərbaycan heç vaxt İran üçün təhlükə yaratmayıb. Əksinə, zamanında İran tərəfindən səslənən qərəzli bəyanatların qurbanı olub. Azərbaycanın qonşularla münasibətləri mehriban qonşuluq və humanizm prinsiplərinə əsaslanır. Belə vəziyyətdə maraqlıdır: nədən müəyyən dairələr Azərbaycanın neytral vəziyyətdə qalmasını həzm edə bilmir və onu müharibə burulğanına çəkməyə çalışır? Bununla belə, Azərbaycan dövlətinin mövqeyi soyuqqanlıdır və adekvat addımlar atılır. Dövlətimiz dünyaya sülh mesajları verir və bu mövqedən çəkilməyəcək.
Azərbaycanın regional layihələrdə iştirakı Cənubi Qafqazda sabitliyin təmin olunmasına xidmət edir. Bununla razılaşmayan müəyyən qüvvələr isə Azərbaycana qarşı təxribatlar təşkil etməyə çalışır. Əsas niyyət budur. Bu məsələdə aidiyyəti strukturlar, dövlətimiz və cəmiyyətimiz hadisələri düzgün qiymətləndirir. Eyni zamanda Azərbaycan dünyaya sülh mesajını çatdırır. Məsələn, Ermənistanla münasibətlərin normallaşdırılması və ölkənin 30 il ərzində işğal altında saxlanıldığı bir mühitdə sülh əlini uzatması bunun bariz nümunəsidir", - deyə Azər Allahverənov yekunlaşdırdı.
Xədicə BAXIŞLI
Sonrakı hadisələr barədə daha çox məlumat almaq üçün ain.az saytını izləyin.
