Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) taxıl, ət və bitki yağlarının bahalaşması səbəbindən fevral ayında qlobal ərzaq qiymətlərinin aylıq bazda 0,9 faiz artdığını elan edib.
AFN.az xəbər verir ki, FAO Ərzaq Qiymətləri İndeksi fevralda əvvəlki aya nisbətən yüksələrək orta hesabla 125,3 bənd təşkil edib. Bununla da indeksdə 5 aydır davam edən eniş tendensiyası başa çatıb.
Təşkilatın açıqlamasında qeyd olunub ki, buğda, bitki yağı və ət qiymətlərindəki artım pendir və şəkər qiymətlərindəki azalmanı kompensasiya edərək ümumi indeksin yüksəlməsinə səbəb olub. Taxıl Qiymətləri İndeksi yanvar ayı ilə müqayisədə 1,1 faiz artıb ki, buna Avropa və ABŞ-dakı şaxta riskləri, eləcə də Qara dəniz regionundakı logistik axsamalar təsir göstərib.
Bitki Yağı Qiymətləri İndeksi fevralda 3,3 faiz artaraq 2022-ci ilin iyunundan bəri ən yüksək səviyyəyə çatıb. Ət Qiymətləri İndeksində qeydə alınan 0,8 faizlik artımda qoyun əti qiymətlərinin tarixi rekorda çatması və Çin ilə ABŞ-dan gələn güclü tələb həlledici rol oynayıb. Digər tərəfdən, Şəkər Qiymətləri İndeksi ABŞ-dakı rekord istehsal sayəsində 4,1 faiz geriləyərək 2020-ci ilin oktyabrından bəri ən aşağı səviyyəyə düşüb.
Eyni zamanda, FAO 2025-ci il üçün qlobal taxıl istehsalı proqnozunu 3 milyard 29 milyon tona çatdıraraq rekord gözləntisini açıqlayıb. 2026-cı il mövsümünün sonunda qlobal taxıl ehtiyatlarının artacağı və ehtiyat-istifadə nisbətinin 31,9 faizlə təhlükəsiz səviyyədə qalacağı proqnozlaşdırılır.
