ABŞ və İsrailin İrana qarşı həyata keçirdiyi son zərbələr, eləcə də İranın cavab hücumları beynəlxalq hüquqa ziddir.
Hafta.az xəbər verir ki, bu sözləri Niderlandın Baş naziri Rob Jetten Haaqa şəhərində keçirilən mətbuat konfransında deyib.
O, qeyd edib ki, bu addımlar beynəlxalq hüquqa zidd olsa da İranın nüvə və raket proqramlarını hədəf alan zərbələrin arxasında duran məntiq müəyyən qədər anlaşılandır.
“İranın özünün də uzun illərdir beynəlxalq hüququ pozduğunu görürük”.
Bununla belə, Jetten vurğulayıb ki, Niderland ABŞ və İsrailin hücumlarını dəstəkləmir.
Onun sözlərinə görə, zərbələr digər ölkələrlə, o cümlədən Niderland hakimiyyəti ilə əvvəlcədən məsləhətləşmədən və ya razılıq alınmadan həyata keçirilib.
Jetten hücumların düzgün qərar olub-olmaması barədə qiymət verməkdən çəkinib.
“Bu sual hazırda aktual deyil, çünki biz hələ də gərginliyin artdığı bir mərhələdəyik”.
Baş nazir əlavə edib ki, hazırda əsas diqqət mövcud gərginlik fonunda Niderlandın və Avropanın maraqlarının qorunmasıdır.
Bu çərçivədə Niderland bölgəyə hərbi gəmi göndərməyi nəzərdən keçirir. Hökumət hava hücumundan müdafiə və komandanlıq funksiyalı “Zr. Ms. Evertsen” freqatının bölgəyə göndərilməsi variantını müzakirə edir. Son qərarın bu həftəsonu aparılacaq əlavə məsləhətləşmələrdən sonra verilməsi gözlənilir.
Jetten bildirib ki, gəminin yerləşdirilməsinə razılıq veriləcəyi ehtimal olunur, missiyanın miqyası və hərbi təlimatlar isə yaxın günlərdə dəqiqləşdiriləcək.
Baş nazir, həmçinin qeyd edib ki, Fransa İranın yaxınlığında yerləşən Avropa ölkələrini mümkün raket və ya pilotsuz uçuş aparatlarının hücumlarından qorumaq üçün “Charles de Gaulle” aviadaşıyıcısından istifadə etməyi öhdəsinə götürüb. Uçuş zamanı mərmiləri ələ keçirmək imkanına malik olan “Evertsen” freqatı da fransız gəmisinin yanında fəaliyyət göstərəcək.
