ABŞ Prezidenti Donald Tramp ABŞ və İsrailin İrana qarşı hücumları, həmçinin İranın cavab zərbələri fonunda yüksələn benzin qiymətləri ilə bağlı narahatlıq keçirmədiyini ifadə edib.
AFN.az xəbər verir ki, "Fox News"un məlumatına görə, "Air Force One" təyyarəsində jurnalistlərin suallarını cavablandıran Tramp bu vəziyyəti 47 ildir edilməsi lazım olan bir işin qısamüddətli sınağı kimi xarakterizə edib. O, heç bir prezidentin buna cürət etmədiyini xüsusi vurğulayıb.
Hörmüz boğazındakı gəmi hərəkətliliyinə toxunan Tramp, İran hərbi dəniz donanmasını məhv etdiklərini və onların hazırda dənizin dibində olduğunu iddia edib. Neft qiymətlərinin tezliklə aşağı düşəcəyini müdafiə edən prezident, ABŞ-ın hələ istifadə etmədiyi nəhəng neft ehtiyatlarına sahib olduğunu xatırladıb.
"İranın hərbi potensialının böyük hissəsi, o cümlədən 44 gəmi və bütün hərbi təyyarələri yox edilib. Tehran rəhbərliyi şərtsiz təslim olmalıdır." - Donald Tramp
Tramp bu münaqişəni dünyanı daha təhlükəsiz edəcək "kiçik bir macəra" adlandırıb. 28 fevralda İranın Minab şəhərində məktəbə edilən və 153 nəfərin ölümü ilə nəticələnən hücumda ABŞ-ın məsuliyyəti barədə suala isə prezident "Xeyr, gördüklərimə əsasən deyə bilərəm ki, bunu İran edib" deyə cavab verib.
