Yeni “Formula-1” mövsümü artıq başlayıb və burada İtaliyanın Ferrari komandası Mercedes və McLaren ilə mübarizə aparır. Lakin 2015-ci ildə birjaya çıxan və ultra bahalı idman avtomobillərinin yeganə ictimai istehsalçısı olan Ferrari tezliklə yarış trasından kənarda da rəqib qazana bilər. İsveçin hiperkar istehsalçısı Koenigsegg Automotive IPO keçirməyi nəzərdən keçirir.
Şirkət artıq açıq səhmdar cəmiyyətinə çevrilib və 2024-cü ildə ilk institusional investorunu cəlb edib. Chieftain Capital Management fondu 50 milyon avro qarşılığında şirkətin 6%-dən bir qədər çox payını əldə edib və bu, biznesi təxminən 1 milyard dollar dəyərində qiymətləndirib. İstehsalçı həmçinin kapital bazarlarında təcrübəsi olan menecerlərlə komandasını gücləndirib: maliyyə direktoru vəzifəsinə Volvo-nun keçmiş CFO-su Yohan Ekdal təyin edilib, hüquqi istiqamətə isə əvvəllər Volvo-da çalışmış Rozmari Sederbom rəhbərlik edir.
IPO-nun konkret vaxtı hələ açıqlanmayıb. Rəhbərlik bildirir ki, şirkət yalnız biznesin dayanıqlılığına və gələcək inkişaf perspektivlərinə tam əmin olduqdan sonra birjaya çıxacaq.
1994-cü ildə sahibkar Kristian fon Keniqseq tərəfindən yaradılan şirkət son illərdə sürətlə böyüyüb: əməkdaşların sayı 2020-ci ildəki 150 nəfərdən hazırda təxminən 850 nəfərə çatıb. 2024-cü ildə Koenigsegg qiyməti 2,8 milyon dollardan 4 milyon dollara qədər olan 56 avtomobil təhvil verib və ümumi sifariş portfeli 400 avtomobili ötür. Şirkətin gəliri 1,4 milyard İsveç kronuna (152 milyon dollar) çataraq bir il ərzində iki dəfədən çox artıb, əməliyyat mənfəəti isə əvvəlki ilin zərərindən sonra 35 milyon kron təşkil edib.
Şirkət hazırda cəmi bir neçə model istehsal edir — bunlara Jesko, CC850 hiperkarları və 2300 at gücünə malik hibrid Gemera daxildir. İstehsalın illik həcmini 150–200 avtomobilə çatdırmaq planlaşdırılır. Potensial IPO istehsalın genişləndirilməsinin maliyyələşdirilməsinə kömək edə bilər. Lakin analitiklər qeyd edirlər ki, istehsalın kiçik həcmi və avtomobillərin əsasən əl ilə yığılması şirkətin açıq bazarda fəaliyyətini çətinləşdirə bilər.
Ekdalın sözlərinə görə, investorlar üçün qiymətləndirmə baxımından əsas müqayisə nöqtəsi Ferrari ola bilər. Bununla yanaşı, bazar Koenigsegg Automotive-i texnologiya şirkəti ilə Hermès International kimi lüks brendin kombinasiyası kimi də qiymətləndirə bilər.
