Fransanın keçmiş prezidenti Nikola Sarkozi yenidən həbs olunacaq. Məhkəmə onun iki fərqli cinayət işi üzrə verilmiş iki hökmü birləşdirmək tələbini rədd edib.
Oxuməni.az xəbər verir ki, bu barədə BFM məlumat yayıb.
Birinci iş qanunsuz telefon danışıqlarının dinlənilməsi ilə bağlı idi, ikinci isə 2012-ci il seçki kampaniyası hesablarının saxtalaşdırılması ilə əlaqədardır. Keçmiş prezidentin vəkilləri hər iki işin birləşdirilməsini və birinci iş üzrə həbs müddətinin ikinci cəzanın ödənilməsi kimi qəbul edilməsini təklif etmişdilər.
Sarkozi vəkillərinin bu işləri birləşdirmək xahişlərinə baxmayaraq, məhkəmə belə bir qərar qəbul etməkdən imtina edib. Beləliklə, keçmiş dövlət başçısı altı ay həbs cəzası formasında əlavə cəza çəkməli olacaq.
25 sentyabr 2025-ci ildə Fransa məhkəməsi Sarkozini Liviya hakimiyyəti tərəfindən 2007-ci il seçki kampaniyasının qanunsuz maliyyələşdirilməsi işində cinayətkar dəstə yaratmaqda təqsirli bilərək beş il müddətinə azadlıqdan məhrum etmişdi.
Noyabr ayında Sarkozi məhkəmə nəzarəti altında həbsdən azad edilib. Bu qərarı Paris məhkəməsinin apelyasiya instansiyası qəbul edib və bununla da keçmiş dövlət başçısının vəkillərinin vəsatətini təmin edib. Sarkozi Liviya lideri Muammar Qəddafidən pul alması ilə bağlı təyin edilmiş beş ilin demək olar ki, üç həftəsini həbsdə keçirib.
Almaz Həsənli
