“İnter” – “Yuventus” matçında baş verən hakim səhvi artıq bir neçə həftədir müzakirə olunur. Bu da təsadüfi deyil: Federiko La Pennanın diqqətsizliyi və Alessandro Bastoninin simulyasiyası Pyer Kalulunun meydandan qovulmasına və Kristian Kivunun komandasının 3:2 hesablı qələbəsinə səbəb olub.
Publika.az xəbər verir ki, qalmaqal həqiqətən də A Seriyasında ilk dördlük uğrunda mübarizəyə təsir göstərə bilər. Buna görə də “Yuve” rəsmiləri və azarkeşləri La Pennanın uzunmüddətli diskvalifikasiya olunmasını və hakimlər komitəsinin rəhbəri Canluka Rokkinin istefasını tələb edirlər.
İtaliya futbolunun aşağı liqalarını izləyən azarkeşlər isə hakim kadrlarının məhz həmin liqalardan axtarılmasını təklif edirlər. Hətta artıq bir namizəd də tapılıb - Culiana Vicile.
Culiana Serie D oyunlarına təyinat alır. İtaliya futbolunun dördüncü liqasında yan xətt hakimi funksiyasını yerinə yetirir. Bundan əvvəl o, “Eccellenza” adlanan turnirin, beşinci divizionunun matçlarında kifayət qədər təcrübə qazanıb. Orada sarı-narıncı bayraqla işlədiyi oyunlarda yaxşı təsir bağışladığı üçün daha yuxarı liqaya yüksəlib.
