ain.az, Bizimyol saytından verilən məlumata əsaslanaraq xəbər yayır.
ABŞ Prezidenti Donald Tramp, administrasiyasının iki üzvü – vitse-prezident Ceyms Devid Vens və Dövlət katibi Marko Rubiodan hansını 2028-ci il seçkilərində Respublikaçı partiyanın potensial namizədi kimi dəstəkləyəcəyinə qərar verməyə çalışır.
Bizimyol.info xəbər verir ki, bu barədə bazar ertəsi günü "The Wall Street Journal" nəşri məlumat yayıb.
Qəzetin məlumatına görə, Tramp Mar-a-Lagodakı qolf klubunda sponsorlar üçün keçirilən tədbirdə iştirakçılardan kimə dəstək verəcəyini soruşub – Vensə, yoxsa Rubioya. Tədbirdə iştirak edən mənbələrə istinadla nəşr qeyd edir ki, “qonaqlar Rubioya daha səsli alqışlar veriblər”.
Buna baxmayaraq, hər iki siyasətçi ilə yaxın olan şəxslər onların dost olduqlarını bildirir. Rubio isə həm açıq şəkildə, həm də şəxsi görüşlərdə Vens ilə rəqabət aparmaq niyyətində olmadığını bəyan edib. Vens isə Respublikaçılar arasında 2028-ci il prezident seçkilərində ən çox şanslı namizəd hesab olunur.
Qəzet qeyd edir ki, Tramp son zamanlar Rubioya qarşı daha müsbət münasibət göstərir, onu şəxsi söhbətlərdə tərifləyir və tərəfdaşlarına Dövlət katibinin prezident yarışında qalib gəlmək şansına malik olduğunu deyir. Bundan başqa, Trampın yeni dönəminin başlanğıcından bəri ABŞ-ın xarici siyasətində fəallaşması Rubionu Ağ Evdə ən vacib qərarların qəbulunda əsas fiqura çevirib və prezident tez-tez ondan məsləhət alır.
Vens tərəfdarları son aylarda tez-tez bildirirlər ki, sağçı böyük lobbiçilər vitse-prezidenti tənqid etməyə pul ödəyirlər və onun əleyhinə planlı media kampaniyası aparılır. Eyni zamanda, Vensə dəstək verənlər arasında ABŞ administrasiyasının rəhbərinin oğlu Donald Tramp Jr., sağçı fəal Çarli Kirkin həyat yoldaşı Erika Kirk və jurnalist Taker Karlson var.
Qadir, Bizimyol.info
Sonrakı hadisələr barədə daha çox məlumat almaq üçün ain.az saytını izləyin.
