“Neftçi” Yuri Vernidubun rəhbərliyi altında ilk məğlubiyyətini aldı.
Ukraynalı çalışdırıcının baş məşqçiliyi dönəmində 7 oyun yenilginin nə olduğunu bilməyən paytaxt təmsilçisi “Turan Tovuz”a uduzdu – 0:1.
Matçdan sonra Sportinfo.az-a müsahibə verən ukraynalı legioner Andrey Ştoqrin yenilgi ilə bağlı sualları cavablandırıb.
- Niyə uduzdunuz?
- İlk növbədə “Turan Tovuz”un yaxşı komanda, layiqli rəqib olduğunu deməliyəm. Bilirdik ki, bizi çətin oyun gözləyir. 90 dəqiqəyə nəzərə salsaq, həm bizim, həm də onların əlverişli qol imkanları oldu. Sadəcə onlar qol vura bildi, biz isə yox. Uduzsaq da, oyun planında “Turan”dan geri qalmadıq.
- Son yarım saatda “Neftçi”də yorğunluq, ağırlıq hiss olunurdu. Xüsusən müdafiədən hücuma çıxanda, kənardan aşkar görünürdü.
- Bu fikrinizlə razılaşmıram. Fiziki planda rəqibdən geri qaldığımızı düşünmürəm. Əksinə, son yarım saatda mütəmadi hücumlar qururduq, təhlükəli vəziyyətlər yaradırdıq. Bərabərsəviyyəli mübarizə oldu. Dediyim kimi, “Turan” qol vurdu, biz yox.
- Bu, “Neftçi” üçün 6, bəlkə də 9 xallıq görüş idi. Qələbə təqdirində turnir cədvəlindəki vəziyyət kifayət qədər yaxşılaşacaqdı.
- Bəlkə də kimlərsə 6, yaxud 9 xal hesablayır. Reallıqda 3 xallıq matç idi və həmin 3 xalı rəqib qazandı.
- Bugünkü nəticədən sonra 3-cü pillədəki “Turan Tovuz”dan 13, 4-cü yerdəki “Zirə”dən 8 xal geri qalırsınız. Avrokuboklara vəsiqə şansı son dərəcə çətin görünür. Çıxış yolu var?
- Qarşıda 10 tur var. Üstəlik, rəqiblərlə müqayisədə 1 oyun az keçirmişik. Ona görə də indidən proqnoz vermək doğru deyil. Qarşımızda duran hədəf var və həmin hədəfə çatmaq üçün sona qədər mübarizə aparacağıq.
- Səmimi cavab gözləyirəm. “Neftçi” bu oyunla avrokuboklara vəsiqəni haqq edir?
- Bunu azarkeşlər, futbol ictimaiyyəti görür və bilir. Mənim nəsə deməyim tərəfkeşlik etmək kimi anlaşılar. Şəxsi fikrimi bilmək istəyirsinizsə, bəli, haqq edir. Bir komanda dekabrdan marta qədər uduzmurdusa, deməli, oyun planında yaxşı nəsə var.
HƏBİB
