Rusiya hərbi sənaye kompleksinin vacib müəssisələrindən biri hesab olunan Bryansk şəhərindəki “Kremniy El” mikroelektronika zavodu Ukraynanın dron zərbələrindən sonra fəaliyyətini dayandırıb.
Musavat.com xəbər verir ki, yayılan məlumatlara görə, müəssisənin istehsal infrastrukturu ciddi zərər görüb və istehsal zənciri pozulub. Məlumata görə, Ukrayna təhlükəsizlik strukturları və xüsusi əməliyyat qüvvələrinin koordinasiyalı dron hücumları nəticəsində zavodun bir neçə istehsal sahəsi və hazır məhsul anbarı zədələnib. Hücum nəticəsində enerji təminatı və texnoloji xətlər sıradan çıxıb. Zavodun rəhbərliyi istehsalın dayandırıldığını təsdiqləyib.
“Kremniy El” Rusiyanın ən böyük mikroelektronika istehsalçılarından biri hesab olunur. Zavod müxtəlif mikroçiplər və elektron komponentlər istehsal edir və bu məhsullar birbaşa Rusiya ordusunun silah sistemlərində istifadə olunur. Zavodda hazırlanan elektron komponentlər aşağıdakı silah sistemlərində tətbiq edilir: S-300 və S-400 zenit-raket kompleksləri; “İskəndər” operativ-taktiki raketləri; “Pantsir” hava hücumundan müdafiə sistemləri; döyüş təyyarələrinin bort elektronikası; müxtəlif pilotsuz uçuş aparatları və radar sistemləri. Bu səbəbdən müəssisə Ukraynanın zərbə siyahısında prioritet hərbi-sənaye obyektlərindən biri sayılır. Bryansk vilayətində yerləşən bu zavod müharibə başlayandan sonra bir neçə dəfə hücuma məruz qalıb. 2023-cü ildə müəssisəyə dron zərbələri endirilmişdi; 2024-cü ilin oktyabrında yeni hücum zavodun enerji sistemini sıradan çıxarmışdı; 2025-ci ilin yanvarında isə daha böyük dron hücumu nəticəsində istehsal tam dayandırılmışdı. Son hücum zamanı altı pilotsuz aparatın zavoda zərbə endirdiyi və bunun istehsal prosesini tam pozduğu bildirilir.
Ukrayna artıq təkcə cəbhə xəttində deyil, Rusiyanın arxa cəbhəsində yerləşən hərbi sənaye obyektlərini də sistemli şəkildə hədəfə alır. Məqsəd Rusiyanın silah istehsalını və logistikasını zəiflətməkdir. Bryansk vilayəti Ukrayna sərhədindən təxminən 100 kilometr məsafədə yerləşir və burada yerləşən müəssisələr Rusiya ordusunun raket və hava hücumundan müdafiə sistemlərinin istehsalında mühüm rol oynayır. Sosial şəbəkələrdə “Kremniy El zavodu artıq mövcud deyil” kimi iddialar yayılsa da, açıq mənbələrə görə müəssisə tam məhv edilməyib, lakin istehsal fəaliyyəti ciddi zərər görərək dayandırılıb. Zərərin real miqyası və zavodun nə vaxt bərpa olunacağı barədə isə rəsmi Moskva hələ dəqiq məlumat açıqlamayıb. Ekspertlər hesab edir ki, zavodun uzun müddət fəaliyyət göstərə bilməməsi Rusiyanın yüksək texnoloji silah istehsalına təsir göstərə bilər.
E.Məmmədəliyev,
Musavat.com
