Kadrlarda tunellərdə böyük həcmdə hərbi texnika, raketlər və dəniz minalarının saxlanıldığı görünür...
Poliqon xəbər verir ki, İranın müxtəlif hərbi texnikaları, silah sistemləri və sursatlarının saxlanıldığı geniş yeraltı tunel şəbəkəsi ilə bağlı görüntülər yayımlanıb. Məlumata görə, kadrlarda ölkənin hərbi arsenalının əhəmiyyətli hissəsinin məhz bu yeraltı obyektlərdə gizlədildiyi nümayiş etdirilir.
“Voenkorı Russkoy Vesnı” teleqram kanalı tərəfindən paylaşılan videoda yeraltı tunellərin müxtəlif növ silah və hərbi texnika ilə dolu olduğu görünür. Görüntülərdə xüsusilə sürətli pilotsuz hücum katerləri, gəmi əleyhinə raket kompleksləri, həmçinin dəniz minaları kimi silahların saxlanıldığı diqqət çəkir.
Videodan görünür ki, tunellər geniş və uzun koridorlardan ibarətdir və burada yerləşdirilən silahlar döyüş istifadəsi üçün hazır vəziyyətdə saxlanılır. Ekspertlər qeyd edirlər ki, belə yeraltı infrastrukturların yaradılması hərbi texnikanın hava zərbələrindən qorunmasına, həmçinin strateji silahların gizli şəkildə yerləşdirilməsinə imkan yaradır.
Analitiklərin fikrincə, İranın bu cür yeraltı hərbi obyektlərdən istifadə etməsi ölkənin müdafiə strategiyasının mühüm elementlərindən biri hesab olunur. Bu tunellər vasitəsilə hərbi texnika və silahların təhlükəsiz saxlanılması, həmçinin zərurət yarandıqda sürətli şəkildə döyüş mövqelərinə çıxarılması mümkün olur.
Müşahidəçilər hesab edirlər ki, bu görüntülərin yayılması regionda artan hərbi gərginlik fonunda İranın hərbi potensialını və xüsusilə dəniz əməliyyatları imkanlarını nümayiş etdirmək məqsədi daşıya bilər.
Poliqon.info
