Venesuelanın prezidenti Delsi Rodriqes ölkənin Karbohidrogenlər Nazirliyi ilə İspaniyanın energetika və neft-kimya şirkəti "Repsol" arasında yeni strateji sazişlərin imzalanması mərasimində iştirak edib.
AFN.az xəbər verir ki, bu barədə Venesuela mediası məlumat yayıb.
"Repsol" nümayəndə heyəti ilə görüşdə Rodriqes vurğulayıb ki, Venesuela enerji sektorunda əməkdaşlığın genişləndirilməsi üçün əsas tərəfdaş kimi mövqelərini möhkəmləndirir və beynəlxalq kapitala etibarlı hüquqi mühit təqdim edir. O qeyd edib ki, "Karbohidrogenlər haqqında" Üzvi Qanunda edilən qismən islahatlar milli istehsala üstünlük verməklə və bütün tərəflər üçün faydalı əməkdaşlıq imkanları yaratmaqla yeni qlobal enerji kontekstinin tələblərinə cavab verir.
"Repsol" ilə əməkdaşlıq təkcə neft hasilatının artırılmasına yönəlməyib, həm də müasir dünya geopolitikasında mühüm sahələr hesab olunan neft-kimya və qaz sektorlarını əhatə edir" - deyə görüşdə bildirilib. Bununla yanaşı, Venesuela respublikanın ən iri karbohidrogen yataqlarının mənimsənilməsi üçün qlobal investorlarla alyanslar qurmağa hazır olduğunu bir daha təsdiqləyib.
