“Tv Musavat”ın canlı efirində çıxış edən siyasi şərhçi Heydər Oğuz bu mərhələdə İranın həyata keçirmək istədiyi planların yalnız cüzi bir hissəsinin qarşısı alındığını vurğulayıb. O qeyd edib ki, bundan sonra İran daha ciddi hərbi əməliyyatlara və ağır bombardmanlara məruz qalacaq.
Heydər Oğuzun fikrincə, ABŞ və İsrailin əsas hədəfləri Bəsic dəstələrinin məhvi, SEPAH-ın strateji mərkəzlərinin ortadan qaldırılması, dini liderlərin, xüsusilə Müctəba Xameneinin və ona yaxın qrupların sıradan çıxarılması olacaq. Şərhçi bildirib ki, müttəfiqlərin başqa yolu yoxdur: onlar ya məğlubiyyəti qəbul edərək bölgədən ayrılmalı, ya da qarşıya qoyduqları bu hədəflərə çatmalıdırlar.
Regionun artıq ağır bir dövrə qədəm qoyduğunu deyən ekspert, bir çox şəhərlərə qarşı çox ciddi hücumların başladığını diqqətə çatdırıb. Onun sözlərinə görə, vəziyyəti ağırlaşdıran əsas amil odur ki, İranın bu hücumların qarşısını almağa kifayət qədər qüvvəsi yoxdur; hava hücumundan müdafiə sistemləri tamamilə məhv edilib, hərbi aviasiyanın qalıqları isə sıradan çıxarılıb.
Bunların İranın ən zəif nöqtələri olduğunu qeyd edən şərhçi, İsrail və ABŞ-ın sərəncamında radara yaxalanmayan ən müasir hərbi hava qüvvələrinin mövcudluğunu vurğulayıb. Bu müstəvidə İranın ABŞ ilə müqayisə edilməyəcək dərəcədə zəif olduğunu deyən H.Oğuz xatırladıb ki, Amerika təkbaşına hərbə demək olar ki, dünyanın qalan bütün ölkələrinin cəmi qədər büdcə ayırır.
Digər tərəfdən, şərhçi iranlıların dözümlü xalq olduğunu və onlarda güclü şiə inancının mövcudluğunu qeyd etsə də, fədakarlığın yalnız qələbə ehtimalı olduqda mənalı olduğunu bildirib. Onun fikrincə, real nəticəsi olmayan müharibədəki fədakarlıq intihar kimi qiymətləndirilməlidir.
Ekspert hesab edir ki, bəzi güclər, xüsusilə Çin, İranı yersiz ruhlandıraraq təhlükəli bir yola itələyib, lakin real dəstək verməyib. Prezident Pezeşkianın da etiraf etdiyi kimi, Tehranın Çindən investisiya gözləntiləri doğrulmayıb. Ən kritik məqam isə BMT Təhlükəsizlik Şurasındakı müzakirələrdə İranın ən çox bel bağladığı müttəfiqləri – Rusiya və Çinin bitərəf qalaraq, dolayısı ilə Tehranın əleyhinə mövqe nümayiş etdirmələri olub.
Ətraflı verilişdən təqdim etdiyimiz hissədə:
