Fransa daxilində sabah seçicilər bələdiyyə seçkilərinin ilk turu üçün sandıq başına gedəcəklər.
"Cebheinfo.az" xəbər verir ki, Fransada iki turdan ibarət bələdiyyə seçkiləri hər 6 ildən bir keçirilir.
Təxminən 49 milyon seçici bələdiyyə seçkilərinin ilk turu üçün sabah, ikinci turu üçün isə 22 martda səs verəcək.
Ölkə miqyasında yerli vaxtla saat 08:00-da başlayacaq səsvermə prosesi kiçik şəhərlərdə 18:00-da, paytaxt Paris kimi böyük şəhərlərdə isə 20:00-dək davam edəcək.
Seçkilərdə 50 478 siyahı üzrə 904 042 namizəd mübarizə aparacaq. İkinci turu 22 martda keçiriləcək seçkilərdə 34 944 bələdiyyənin rəhbərliyi müəyyənləşəcək.
Fransadakı 68 bələdiyyə üçün heç bir namizəd müraciət etmədiyi halda, bu rəqəm 2020-ci ildə keçirilən bələdiyyə seçkilərinin ilk turunda 106 olmuşdu.
Sözügedən bələdiyyələrdə seçki keçirilməyəcək və bələdiyyə işləri əyalət tərəfindən təyin edilən 3 nəfərlik nümayəndə heyəti tərəfindən idarə olunacaq.
İlk turun qeyri-rəsmi nəticələri seçki qadağalarının başa çatdığı saat 20:00-dan etibarən mediada elan ediləcək.
