Bizimyol saytından verilən məlumata görə, ain.az xəbər verir.
ABŞ, İsrail və İranın iştirak etdiyi münaqişənin kəskinləşməsi enerji daşıyıcıları və gübrə tədarükündə fasilələr yaradır. Bu isə Nigeriyada ərzaq qıtlığı və inflyasiyanın artması riskini gücləndirir.
Bizimyol.info xəbər verir ki, bu barədə Nigeriyanın "This Day" qəzeti ekspertlərə istinadən yazıb.
Nigeriyada Özəl Sahibkarlığın Təşviqi Mərkəzinin icraçı direktoru Muda Yusuf qəzetə müsahibəsində bildirib ki, vəziyyət ciddi narahatlıq doğurur.
Onun sözlərinə görə, gübrələr kənd təsərrüfatında məhsuldarlığın artırılmasının ən mühüm amillərindən biridir. “Biz çox narahatıq, çünki gübrə kənd təsərrüfatının səmərəliliyini artıran əsas faktorlardan biridir. Fars körfəzində davam edən münaqişə artıq qlobal gübrə bazarlarını, xüsusilə karbamid bazarını sarsıdıb. Hörmüz boğazının mümkün bağlanması enerji və gübrə bazarlarına, eləcə də onların tədarükünə ciddi təzyiq göstərir. Nigeriya üçün bu birbaşa risklər yaradır — gübrələr əlçatmaz olarsa, ərzaq istehsalı azalacaq və ərzaq inflyasiyası daha da sürətlənəcək”, – deyə Yusuf qeyd edib.
O, Nigeriya hökumətini gübrələrin idxalına tətbiq olunan rüsumları azaltmağa çağırıb.
Nigeriya Fermerlər Assosiasiyasının Laqos bölməsinin icraçı direktoru Şakin Aqbeyevanın fikrincə, gübrələrin bahalaşması aşağı gəlirli fermerlər üçün onları əlçatmaz edə bilər. Laqos Ticarət və Sənaye Palatasının kənd təsərrüfatı komitəsinin sədri Omotunde Banjoko isə hesab edir ki, fermerlər istehsal xərclərinin – o cümlədən gübrə qiymətlərinin artmasının – yükünü son nəticədə istehlakçıların üzərinə qoyacaqlar.
Xatırladaq ki, 28 fevralda ABŞ və İsrail İrana qarşı hərbi əməliyyata başlayıb. Zərbələr İranın ən böyük şəhərlərinə, o cümlədən paytaxt Tehrana endirilib. Ağ Ev hücumu Tehrandan qaynaqlandığı iddia edilən raket və nüvə təhlükəsi ilə əsaslandırıb.
İranın İslam İnqilabı Keşikçiləri Korpusu isə cavab olaraq genişmiqyaslı əməliyyat başladığını bildirərək İsraildəki obyektləri hədəfə alıb. Bundan başqa, Bəhreyn, İordaniya, Qətər, Küveyt, BƏƏ və Səudiyyə Ərəbistanında yerləşən ABŞ obyektlərinə də zərbələr endirildiyi qeyd olunur.
Bizimyol.info
Hadisənin gedişatını izləmək üçün ain.az saytında ən son yeniliklərə baxın.
