ain.az, Qaynarinfo portalından verilən məlumatlara əsaslanaraq xəbər verir.
ABŞ 2021-ci ildə Pentaqon tərəfindən rəsmi şəkildə dayandırılmış silah hazırlanması proqramını yenidən bərpa edib. Belə ki, ABŞ Hərbi Dəniz Qüvvələri Nyu-Meksiko ştatındakı White Sands poliqonunda elektromaqnit topunun sınaqlarını keçirib.
Qaynarinfo xəbər verir ki, bu barədə "Defense Romania" nəşri yazır.
Materialda qeyd olunur ki, elektromaqnit topunun əsas xüsusiyyəti kimyəvi atıcı maddələrdən – məsələn, barıtdan – tam imtinadır. Sistem güclü maqnit sahəsi yaratmaq və mərmini iki paralel keçirici rels boyunca sürətləndirmək üçün elektrik enerjisindən istifadə edir. Bu proses Lorens qüvvəsinin tətbiqi ilə baş verir.
Nəticədə mərminin lülədən çıxış sürəti 7 Max-dan çox olur.
Belə ekstremal sürətdə mərminin partlayıcı başlığa ehtiyacı qalmır. Zərbə anında yaranan təmiz kinetik enerji düşmən gəmisini, ballistik raketi və ya təyyarəni 100 dəniz milindən artıq məsafədə məhv etmək üçün kifayət edir.
Məlumata görə, 2025-ci ilin fevralından etibarən bu sınaqların yenidən başlanmasının əsas səbəbi müasir müharibələrin silah sistemləri baxımından çox böyük maliyyə xərcləri tələb etməsidir.
"Defense Romania" yazır ki, ənənəvi idarəolunan raketlər və tutucu sistemlər hər biri milyonlarla dollar dəyərindədir və döyüş gəmilərinin raket şaxtalarında böyük yer tutur. Elektromaqnit üsulla buraxılan mərmi isə sadə metal inert elementdir – onu istehsal etmək ucuzdur və partlayış riski olmadan təhlükəsiz saxlanıla bilər.
Bildirilir ki, belə sistemlə təchiz edilmiş gəmi onlarla mürəkkəb raket əvəzinə yüzlərlə elektromaqnit mərmi daşıya bilər.
Nəşrin qeydinə görə, uzun müddət fasiləsiz atəş açmaq qabiliyyəti xüsusilə "həddindən artıq yükləmə hücumları” adlanan taktikalara qarşı vacibdir. Bu taktika zamanı rəqib tərəf eyni anda çoxlu sayda ucuz mərmi buraxaraq hərbi dəniz qruplaşmasının hava hücumundan müdafiə sistemlərini tükəndirməyə çalışır.
Buna görə də son sınaqlar ABŞ ordusunun bu yüksək sürətli buraxılış sisteminə ehtiyac duyduğunu göstərir. Ordu rəqiblərinin inkişaf etdirdiyi yeni hərbi texnologiyalarla ayaqlaşmağa çalışır.
Nəşr qeyd edir ki, White Sands poliqonunda sınaqların bərpası Müdafiə Nazirliyi səviyyəsində qəbul olunmuş qərarı təsdiqləyir. Ekspertlərin fikrincə, klassik silah sistemləri texniki və iqtisadi baxımdan demək olar ki, maksimum həddə çatıb və ABŞ-ın gələcək onilliklərdə dənizdə üstünlüyü elektromaqnit silah sistemlərini tətbiq etmək qabiliyyətindən asılı olacaq.
Aydın
Ən son xəbərləri və yenilikləri almaq üçün ain.az saytını izləyin.
