Tehranın xarici işlər naziri Moskva və Pekinin İranın strateji tərəfdaşları olduğunu bildirərək hərbi əməkdaşlığın da mövcudluğunu təsdiqləyib...
Poliqon xəbər verir ki, İranın xarici işlər naziri Abbas Araqçi ölkəsinin Rusiya və Çinlə strateji tərəfdaşlıq münasibətlərinə malik olduğunu və bu əməkdaşlığın hərbi sahəni də əhatə etdiyini açıqlayıb. Nazir bildirib ki, Tehran uzun müddətdir Moskva və Pekinlə siyasi, iqtisadi və müdafiə istiqamətlərində sıx əməkdaşlıq edir, lakin bu əməkdaşlığın konkret detalları açıqlanmır.
Araqçi ABŞ-nin CBS telekanalına müsahibəsində həmçinin İranın dağıdılmış nüvə obyektlərinin qalıqları altından zənginləşdirilmiş uranın çıxarılması ilə bağlı hazırda heç bir planının olmadığını bildirib. Onun sözlərinə görə, nəzəri olaraq belə bir proses Beynəlxalq Atom Enerjisi Agentliyinin nəzarəti altında həyata keçirilə bilər, lakin Tehran bu istiqamətdə hələlik addım atmağı planlaşdırmır.
Nazir əlavə edib ki, İran hazırda bir sıra dövlətlərlə onların gəmilərinin Hörmüz boğazından təhlükəsiz keçidinin təmin edilməsi məsələsi ilə bağlı danışıqlar aparır. Bununla belə, bu məsələdə yekun qərarın İran hərbi rəhbərliyi tərəfindən veriləcəyini vurğulayıb.
Araqçi ABŞ ilə İran arasında aparıla biləcək danışıqlara da toxunaraq bildirib ki, hazırda tərəflər arasında müzakirə olunan konkret təkliflər yoxdur. O qeyd edib ki, Tehran əvvəllər nüvə silahı hazırlamaq niyyətinin olmadığını göstərmək üçün müəyyən güzəştlərə hazır idi, lakin mövcud şəraitdə ölkə özünü müdafiə etməyə hazırdır və nə atəşkəs, nə də danışıqlar üçün müraciət etmir.
İranın xarici işlər naziri ölkədə internetə tətbiq edilən məhdudiyyətlərin də davam edən müharibə şəraitində təhlükəsizlik səbəbilə tətbiq olunduğunu bildirib. O həmçinin İran həbsxanalarında saxlanılan ABŞ vətəndaşlarının təhlükəsizliyinin təmin ediləcəyini qeyd edib və vurğulayıb ki, ABŞ və İsrail onların saxlanıldığı yerlərə zərbə endirmədiyi halda həmin şəxslər təhlükə ilə üzləşməyəcək.
Bununla yanaşı, İran dövlət televiziyası Tehran tərəfindən ilk dəfə olaraq “Sejjil” tipli superağır bərk yanacaqlı ballistik raketlərin tətbiq edildiyini açıqlayıb. İran mediasının məlumatına görə, hücumlar zamanı həmçinin “Khorramshahr”, “Kheibar Shekan”, “Emad” və “Qadr” tipli raketlərdən də istifadə olunub.
Bildirilir ki, raket zərbələri ABŞ-nin hərbi infrastruktur obyektlərini, eləcə də idarəetmə və qərar qəbul etmə mərkəzlərini hədəfə alıb. İran tərəfi bu hücumların regionda davam edən eskalasiya fonunda həyata keçirilən cavab tədbirlərinin bir hissəsi olduğunu bəyan edib.
Poliqon.info
