Polşanın Avropa Birliyindən çıxması “real təhlükəyə” çevrilib. Vətəninfo.az xəbər verir ki, bunu Baş nazir Donald Tusk Twitter -də bildirib .
Siyasətçi Polşanın millətçi prezidenti Karol Navrotski və sağçı müxalifət partiyalarını ölkəni blokdan çıxmağa sövq etməkdə günahlandırdı. O, bildirib ki, həm ifrat sağçı Konfederasiya alyansının fraksiyaları, həm də millətçi Hüquq və Ədalət (PiS) partiyasının deputatlarının əksəriyyəti Polşanı AB-dən çıxarmağa çalışır.
Donald Tusk vurğulayıb ki, “Navrokski onların himayədarıdır. Rusiya, Amerika MAGA hərəkatı və Orbanın rəhbərlik etdiyi Avropa sağçıları Aİ-ni məhv etmək istəyirlər. Polşa üçün bu, fəlakət olardı. Mən onları dayandırmaq üçün hər şeyi edəcəyəm”.
“Politico” qeyd edir ki, Polşa baş nazirinin açıqlaması Prezident Navrotskinin Polşanın Aİ-dən 43,7 milyard avroya qədər güzəştli müdafiə krediti almasına imkan verən qanun layihəsinə veto qoymasından sonra verilib. Eyni zamanda, Tusk hökumətində prezident vetosunu dəf etmək üçün parlament çoxluğu yoxdur.
Məqalədə izah olunur ki, bu vəziyyət Polşanın bu il ümumi daxili məhsulun təxminən 5 faizini təşkil etməsi planlaşdırılan hərbi xərclərini necə maliyyələşdirəcəyi ilə bağlı qeyri-müəyyənliyi artırır.
Tusk xəbərdarlıq etdi ki, Navrotskinin vetosu Polşanın Aİ-dəki mövqeyini zəiflədə bilər.
Son sorğular göstərir ki, Polşanın Aİ-dən çıxmasına dəstək ölkədə aşağı səviyyədə qalır, lakin artıq əhəmiyyətsiz deyil. Polşalıların hər on nəfərindən biri ilə dörd nəfərindən biri ölkənin blokdan çıxması prosesinin başlamasını dəstəkləyəcək. Bununla belə, sorğuda iştirak edənlərin böyük əksəriyyəti hələ də Polşanın Avropa Birliyində üzvlüyünü qoruyub saxlamağın tərəfdarıdır.
Daha əvvəl Aİ-nin baş diplomatı Kaya Kallas ABŞ-ın Avropaya qarşı siyasətinin Avropa İttifaqının birliyini zəiflətməyə yönələ biləcəyini bildirmişdi . O, Aİ üzv dövlətlərinin Vaşinqtonla ayrıca danışıqlar aparmaq əvəzinə, vahid siyasi blok kimi çıxış etməli olduqlarını vurğulamışdı.
Bu arada, İslandiya Aİ-yə üzvlüklə bağlı referendum keçirməyi planlaşdırır. Ölkə əhalisi 29 avqustda bloka üzvlüklə bağlı danışıqların bərpa edilib-edilməyəcəyinə qərar vermək üçün səs verəcək.
