2026-cı il üzrə qlobal iqtisadi göstəricilərin əvvəlki proqnozlarla müqayisədə bir qədər aşağı qiymətləndirilməsi maliyyə bazarlarında müəyyən ehtiyyatlı yanaşmanın formalaşmasına gətirib çıxarır. İnflyasiya, faiz dərəcələri, qeyri-müəyyənliklər vətəndaşların maliyyə qərarlarına daha diqqətlə yanaşmalarına səbəb olur. Belə bir şəraitdə bank əmanətlərinin təhlükəsizliyi, sərfəliliyi məsələsi yenidən aktuallaşıb.
İqtisadçı ekspert Əkrəm Həsənov Pravda.az-a bildirib ki, ölkədə sahibkarlıq üçün normal şərait olmadığı üçün depozit ən təhlükəsiz və gəlirli sahədir:
“Sadəcə, milli valyutada 12 faiz, xarici valyutada 2,5 faiz gəlirlilik olur. Milli valyutada devalvasiya ola bilər. Devalvasiya olsa, artıq gəlir düşəcək. Faktiki olaraq insanlar daha çox xarici valyutada saxlamağa üstünlük verirlər. Yenə də 2,5 faiz elə də az deyil”.
İqtisadçı Xalid Kərimlinin sözlərinə görə, hazırkı halda banklara əmanət qoymağın əlverişliliyi hər insana görə dəyişir: “İnvestor mövcud olan pulunu daha yüksək, məsələn, 15-20 faiz gəlirliliklə yerləşdirə bilərsə, banka niyə 10-11 faizə versin? Bu investorun, sahibkarın pulunu dəyərləndirməsindən asılıdır. Sahibkar öz pulunu biznesində daha yüksək dövriyyə kapitalına qoyaraq daha yüksək gəlirliyi ilə işlədə bilirsə, banka 10-11 faizə qoymağa dəyməz. Pulunu evdə saxlayanlar üçün isə banka qoymaq daha əlverişlidir. Valyuta riski isə hər zaman var. Bir az çox, bəzən az olmağından asılı olmayaraq risk hər zaman var. Dövlət 100 min manatadək olan vəsaitləri sığortalayır. Yəni bir banka 100 min manatadək əmanət qoysanız, heç bir bank riski mövcud deyil. Bank çöksə də Əmanətlərin Sığortalaması Fondu sizin pulunuzu qaytaracaq. Alternativlər çoxdur. Biri düşünə bilər ki, pul əmlaka yatırılsa daha çox qazanılar, digəri hesab edər ki, depozitlərə qoyulsa, daha sərfəli olar. Bank depozitləri Azərbaycan vətəndaşı üçün həmişə əlverişli imkanlardan biridir”.
Şəhanə Quliyeva
