Tanınmış telerejissor Rauf Süleyman 82 yaşında vəfat edib.
Bu barədə NOCOMMENT.az-a onun yaxınları məlumat verib.
R.Süleyman uzun illərdir Kanadanın Toronto şəhərində yaşayırdı.
Qeyd edək ki, Rauf Süleyman Mirzəyev 1944-cü il yanvarın 22-də Bakıda, görkəmli teatrşünas Həsənağa Mirzəyev və Azərbaycan səhnəsinin ana obrazlarının ifaçısı, Azərbaycan SSR əməkdar artisti Ətayə Əliyevanın ailəsində dünyaya göz açıb.
O, orta məktəbi bitirdikdən sonra indiki Azərbaycan Dövlət Mədəniyyət və İncəsənət Universitetinin teatrşünaslıq fakültəsinə daxil olub.
1968-ci ildən Azərbaycan Televiziyasında mikrofon operatoru kimi işə başlayıb və beləcə, bütün ömrünü televiziyaya bağlayıb.
Bütün rejissor kateqoriyalı dərəcələri keçib və 1997-ci ildə ali dərəcəli rejissor kimi fəaliyyətini davam etdirib.
Sırada “Xoşbəxt adam”, “Ömür ağacı”, “Dostun evi könüllərdir”, “Ədalət naminə”, “Tariximiz”, “Bəxtiyar Vahabzadə”, dörd hissəli “Türk Dünyası – Qitədən-Qitəyə” televiziya filmlərini bir rejissor kimi yüksək sənətkarlıqla ərsəyə gətirib.
Bununla yanaşı, “Səslər muzeyi”, “Ömrün axarı” kimi silsilə proqramlar hazırlayıb.
Rauf Süleyman Azərbaycan Televiziyasında ən uzun ömürlü proqramlardan biri olan, həftəlik “Turan” verilişinin rejissoru olub.
O, Azərbaycan Kinematoqrafçılar İttifaqının (AKİ) İdarə Heyətinin üzvü, rejissor Ramiz Həsənoğlunun qardaşıdır.\\yenisabah.az
