Rusiya Dövlət Duması miqrantlar üçün patent və müvəqqəti yaşayış icazələrinin (MYİ) verilməsi şərtlərini dəyişdirən qanun layihəsini birinci oxunuşda qəbul edib.
"Yeni Sabah" Interfax-a istinadla xəbər verir ki, Rusiya hökumətinin irəli sürdüyü layihəyə əsasən, "Rusiya Federasiyasında xarici vətəndaşların hüquqi statusu haqqında" qanuna dəyişikliklər təklif olunacaq.
Bu təklifə görə, miqrant işçi hazırda olduğu kimi yalnız özləri üçün deyil, həm də Rusiyada olan bütün ailə üzvləri üçün sabit avans vergisi ödəməli olacaq. Miqrant işçi və onun ailə üzvləri üçün Rusiya Federasiyasında qalma müddəti əmək müqaviləsinin müddəti ilə müəyyən ediləcək. Xarici vətəndaşın əmək müqaviləsinə xitam verilibsə, 18 yaşına çatmış uşaqları Rusiyanı 30 gün ərzində tərk etməlidirlər.
Miqrantın gəliri haqqında məlumat yoxdursa və ya alınan ümumi gəlir miqrant və hər bir ailə üzvü üçün yaşayış minimumundan azdırsa, xarici vətəndaş üçün patent və ya iş icazəsinin ləğv ediləcəyi nəzərdə tutulur.
Həmçinin əcnəbilərin müvəqqəti yaşayış icazəsi və ya daimi yaşayış icazəsi almaq şərtlərinin yenidən nəzərdən keçirilməsi təklif olunur. Cari il ərzində görülən işlər 10 aydan az davam edərsə, bu sənədlər verilməyəcək və ya ləğv ediləcək.
Qanun layihəsində həmçinin "yüksək ixtisaslı işçi qüvvəsi" kateqoriyasına daxil olmaq üçün meyar kimi aylıq əmək haqqının müəyyən edilməsi təklif olunur: əksər yüksək ixtisaslı mütəxəssislər üçün əmək haqqı ayda 717.000 rubl, tibb, müəllimlik və tədqiqat işçiləri, akkreditə olunmuş şirkətlərdə İT mütəxəssisləri və Skolkovo və Sirius sakinləri üçün əmək haqqı ayda 358.500 rubl olmalıdır.
Telegram kanalımız
