ain.az, GlobalInfo portalına istinadən məlumat verir.
Azərbaycanda bir çox populyar şou və sosial yönümlü TV proqramları efirdən çıxarılır. Xüsusən Xoşqədəm Hidayətqızı, Zaur Baxşəliyev, Zaur Kamal, Elgiz Əkbər, Zaur Nəbioğlu kimi tanınmış aparıcıların verilişlərinin yayımı dayandırılıb. Ümumilikdə ölkənin əsas telekanallarında sistemli dəyişikliklərin olacağı, yeni proqramların ortaya qoyulacağı bildirilir.
Bu prosesin pərdəarxasında nələr var?
Globalinfo.az-a danışan deputat Fazil Mustafa bildirib ki, indiki şərtlərdə sosial proqramların mövcudluğu cəmiyyətdəki problemlərin qabardılması baxımından faydalıdır:
“Amma bu proqramların həddən artıq ayrı-ayrı, şou xarakterli məcralara yönəldilməsi və orada qeyri-etik proseslərin körüklənməsi cəmiyyətdə müəyyən çağırışlara səbəb olub. Hesab edirəm ki, bu cür verilişlərin qalmasında problem yoxdur, sadəcə, alternativlər də olmalıdır. Əgər alternativlər olmayacaqsa, cəmiyyət yenidən bu tip proqramlara yönələcək. Biz ağıllı, düzgün alternativləri təqdim etməliyik. Əks halda, bu cür təsir imkanları effektli görünməyəcək. Yaranan boşluğu nə ilə dolduracaqsan? Əgər bu boşluğu analitik düşüncə verilişləri ilə doldurmaq istəsək də, bu yetərli olmaya bilər, çünki belə bir düşüncə yükünü daşıya biləcək potensial çox böyük deyil”.
Fazil Mustafa
Deputat əlavə edib ki, Azərbaycanda bayağılığın yükünü daşıyacaq potensial hədsiz böyükdür:
“Amma düşüncə platformasını təqdim edə biləcək say cüzidir. Belə vəziyyətdə televiziyalar bu subyektləri tapmaqda çətinlik çəkəcəklər. Eyni zamanda, fikir azadlığının hüdudlarına da diqqət yetirilməlidir. Əgər hüdudlar geniş olmazsa, cəlbedici və düşüncə azadlığına xidmət edə biləcək platforma yaratmaq çətin olacaq. Əgər belə bir platforma yaranarsa, televiziyaların verilişləri daha cəlbedici ola bilər. Əks halda, şou üslublu verilişlərin bağlanmasının yerini doldurmaq effekti çox böyük olmayacaq. Hər halda, bu məsələ mütəxəssislər tərəfindən müzakirə olunmalı və gündəmin əsas mövzularından birinə çevrilməlidir. Hesab edirəm ki, bu verilişlər sponsorsuz qalsa, bağlanmalı olacaqlar və bu da reallıqdır”.
Mediada İnnovativ Təşəbbüslərə Dəstək İctimai Birliyinin sədri və media eksperti Müşfiq Ələsgərli isə bildirib ki, əyləncəli proqramların təşkil olunması medianın funksiyalarından biridir:
“Media həm maarifləndirmə, həm məlumatlandırma, həm də əyləndirmə funksiyalarını yerinə yetirən subyektlərdir. Lakin vacib məqam əyləndirmə prosesinin içində də maarifləndirmə və məlumatlandırma funksiyasının həyata keçirilməsidir. Şou proqramlarda belə ictimai məzmun və marağa xidmət edən elementlər olmalıdır”.
Müşfiq Ələsgərli
M.Ələsgərli əlavə edib ki, bu proqramların qeyri-peşəkar hazırlanması, ictimai marağa zidd mövzuların müzakirəyə çıxarılması, xüsusilə ailə və məişət məsələlərinin primitiv və ziyanlı formada təqdim olunması narahatlıq doğurur:
“Ona görə də Azərbaycanda şou proqramlarla bağlı efirdə yayılan materiallarda əsas narahatlıq bu hallarla bağlıdır. Ümumilikdə isə əyləncəli proqramların təşkili media fəlsəfəsinə zidd deyil. Problem bəzi televiziya verilişlərinin qeyri-peşəkar hazırlanması, ictimai əxlaq və düşüncəyə zidd mövzuların müzakirəyə çıxarılmasıdır. Bu səbəbdən şou proqramların efirdən yığışdırılması və onların yerinə keyfiyyətli verilişlərin təqdim olunmasına dair tələblər haqlı və vacibdir. Əslində Azərbaycanda bununla bağlı uğurlu nümunələr mövcuddur”.
M.Ələsgərli qeyd edib ki, əvvəllər Azərbaycanda şou proqramlarda cəmiyyəti maraqlandıran mövzular – siyasi, mədəni və məişət məsələləri faydalı və abırlı şəkildə müzakirəyə çıxarılıb:
“Hesab edirəm ki, həmin ənənələr bərpa olunmalı və indiki dövrün texnologiyalarından istifadə etməklə verilişlərin görüntü, keyfiyyət və məzmunu daha da artırılmalıdır. Yanlış fikir var ki, auditoriyanı cəlb etmək üçün yalnız bayağı verilişlər hazırlanır. Azərbaycanda efir mədəniyyəti və təcrübəsi mövcuddur. Ciddi və əhəmiyyətli məsələlər ətrafında siyasi və digər mövzularda şou proqramlar hazırlanıb və kifayət qədər auditoriya əldə edib. Düşünürəm, bu məsələdə ciddi addımlar atmağın vaxtı çatıb”.
Zaira Akifqızı
Globalinfo.az
Hadisənin gedişatını izləmək üçün ain.az saytında ən son yeniliklərə baxın.
