Şahzadələr Uilyam və Harri arasında münasibətlərin gərginləşdiyi bir vaxtda şahzadə Diananın bir vaxtlar gizli şəkildə kiçik oğlu Harrini kral olmaq ehtimalına hazırladığı barədə məlumat yayılıb.
Ölkə.az xəbər verir ki, bu barədə "Fox News" yazır.
Uels şahzadəsinin yaxın dostu Riçard Key "Daily Mail" nəşrinin podkastında bildirib ki, Diana hesab edirdi ki, Uilyam artıq öz taleyini anlayır, lakin o, "utancaq” idi və gələcəkdə onu gözləyən məsuliyyətdən narahatlıq keçirirdi.
"Məncə, Uilyam müəyyən mənada gözlənilməz idi. O, utancaq bir gənc idi. Anası sağ olanda mənə deyirdi ki, heç vaxt Uilyamın "ən yüksək vəzifəni" istədiyini düşünməyib. Yəni bir gün tac taxmaq ideyasını. Öz düşüncəsində o, bəlkə də məhz Harrinin atasının varisi ola biləcəyi ehtimalına zəmin hazırlayırdı. O, Harrini kiçik bir ləqəblə çağırırdı - "Yaxşı kral Harri". Bu, orta əsrlərə işarə idi. Lakin əlbəttə, hər şey fərqli cərəyan etdi", deyə Key qeyd edib.
Bununla yanaşı, "Fox News Digital" ilə danışan bir neçə kral ailəsi eksperti bu fikirləri təkzib edərək bildiriblər ki, Diana həmişə kimin kral olacağını bilirdi və bu, Harri deyildi.
"Şahzadə Uilyam tac uğrunda mübarizə apararaq önə çıxmayıb. O, bu rola tədricən yetişib. Bu yanaşma müasir monarxiyaya uyğundur – burada ambisiyadan çox vəzifə ön plandadır. Bu, onu düşüncəli, ölçülü-biçili və ən əsası təkəbbürlü olmayan biri kimi təqdim edir. Əksinə, diqqət tələb edənlər adətən niyə bu vəzifəyə uyğun olmadıqlarını göstərirlər. Bu, daha çox bir ananın iki fərqli oğlunu necə tərbiyə etməsinə bənzəyir, nəinki hansısa peyğəmbərcəsinə proqnoza”, deyə "Kinsey Schofield Unfiltered" proqramının aparıcısı Kinzi Skofild bildirib.
Onun sözlərinə görə, şahzadə Diana böyük oğlunun taleyini yüngülləşdirməyə çalışırdı.
"Diana Harrinin özünü ikinci planda hiss etməsinə həssas yanaşırdı, buna görə "yaxşı kral Harri" ideyası daha çox emosional tarazlıq yaratmaq cəhdi idi, konstitusion uzaqgörənlik yox. Şahzadə Uilyam isə həmişə introvert olub və üzərinə böyük gözləntilər yükü düşüb. Diana taleyi proqnozlaşdırmaqdan çox, onu yumşaltmağa çalışırdı”, deyə o vurğulayıb.
Skofild əlavə edib ki, monarxiyada varislik məsələsində heç vaxt qeyri-müəyyənlik olmayıb:
"Monarxiya heç vaxt varisliklə bağlı tərəddüd etməyib, yalnız ictimai əhval-ruhiyyə ilə bağlı suallar olub. Diana bu rolun emosional yükünü yaxşı anlayırdı və Vilyamın bunu dərindən hiss etdiyini görürdü. Onun bu işi istəyib-istəməməsi instituta şübhə deyil, bu vəzifənin psixoloji qiymətinin qəbuludur. Bu, konstitusion narahatlıq yox, analıq realizmidir”.
Riçard Key həmçinin qeyd edib ki, keçmişdə də şahzadə Marqaretin bacısı şahzadə Yelizavetadan daha uyğun monarx olub-olmayacağı müzakirə edilirdi:
"Məncə, ümumi fikir belədir: "biz doğru insanı seçmişik" və həqiqətən də doğru insan seçilib. Uels şahzadəsi kimi Uilyam bu rola uyğunlaşıb. Əvvəllər o, bir qədər qapalı və tərəddüdlü görünürdü, lakin indi bu rolu mənimsəyib. Onun yanaşmasında xoşuma gələn odur ki, o, kral roluna kifayət qədər qeyri-adi yanaşmalar təklif edir. O anlayır ki, monarxiyanın bəzi aspektləri müasir cəmiyyət üçün cəlbedici deyil və onun yaşaması üçün ciddi dəyişikliklər etməli olacaq".
Skofild vurğulayıb ki, həyatının son illərində Diana kimin kral olacağını açıq şəkildə ifadə edib:
"Açıq danışaq: BBC-nin "Panorama" proqramına verdiyi müsahibədə o, heç vaxt Harrinin gələcək kral olacağını deməyib. Onun sözlərinə görə, əgər varislik xəttində dəyişiklik olsaydı, o zaman şahzadə Çarlzı ötüb birbaşa Uilyamı göstərərdi. Bu, qeyri-müəyyənlik deyil, inamdır. O, tacı kimin daşımalı olduğunu dəqiq bilirdi. Bu, onun ilk oğlu idi".
Qeyd edək ki, daha əvvəl Harrinin Meqan Markl ilə bağlı kral ailəsi ilə erkən münaqişəsi də üzə çıxmışdı. Mənbələrə görə, bu hadisə Harrinin monarxiya institutu ilə ilk ciddi qarşıdurmalarından biri olub.
Bundan əlavə, media şahzadə Diana haqqında yeni filmin Uilyam və Harri arasında fikir ayrılığı yaratdığını yazıb. Söhbət "Netflix" platforması üçün nəzərdə tutulan və guya 2027-ci ildə – Diananın ölümünün 30-cu ildönümündə yayımlanması planlaşdırılan layihədən gedir.(Qaynarinfo)
