Britaniyanın ən yaşlı supermodeli Dafna Self 97 yaşında vəfat edib. Ailəsi onun ölümünü ötən şənbə günü elan edərək təbii səbəblərdən öldüyünü bildirib.
Ailə sosial mediada çiçəklənən maqnoliya ağacı və doğum tarixləri ilə vida mesajı paylaşıb: 1 iyul 1928 - 21 mart 2026.
“Cebheinfo.az” xəbər verir ki, əsl əfsanə olan model 70 yaşında gözlənilmədən öz sahəsinə qayıtdıqdan sonra dünya miqyasında şöhrət qazanıb. Daha sonra o, “Dolce & Gabbana” üçün modellik edib və “British Vogue” jurnalında çıxış edib.
Dafnanın karyerası 1940-cı illərin sonlarında başlayıb. O, “John Lewis”-in moda şöbəsində işləyərkən müsabiqədə qalib gəlib və jurnalın üz qabığında fotosu çıxıb. Lakin o, daha sonra ailəsi üçün modellikdən ayrılıb.
Onun əsl geri dönüşü 1998-ci ildə baş verib. O zaman 70 yaşında London Moda Həftəsindəki şouya dəvət olunub. Daha sonra karyerasına ikinci nəfəs gəlib. Self 20 ildən çox “Models 1” agentliyində çalışıb və Mario Testino da daxil olmaqla, aparıcı brendlər və fotoqraflarla əməkdaşlıq edib.
O, “Nivea”, “Gap” və “Primark” kimi brendlər üçün modellik edib və Ginnesin Rekordlar Kitabına ən yaşlı peşəkar model kimi daxil edildi.
Ağsaçlı ikon modada qocalma gözəlliyini qeyd edən "greynaissance" trendinin simvoluna çevrilmişdi. Dafna Self həmişə gözəllik standartları barədə açıq danışıb. Onun məşhur ifadəsi olan "Böyük bir təbəssüm botoksdan daha yaxşıdır" bir çox qadın üçün şüar halına gəlib.
Hətta qocalıqda belə, o, aktiv idi, yoqa, balet, pilateslə məşğul olur və qadınlar üçün öz akademiyasını açaraq öz təcrübəsini başqaları ilə bölüşürdü: "Yeni bir şeyə başlamaq üçün heç vaxt gec deyil".
