Oxumeni.az portalından əldə olunan məlumata əsasən, ain.az xəbər verir.
ABŞ İranda yeni lider kimi parlamentin spikerini nəzərdən keçirir
ABŞ prezidentinin administrasiyası İranda parlamentin spikeri Məhəmmədbəqir Qalibafı danışıqlar üçün potensial tərəfdaş, hətta yeni lider kimi nəzərdən keçirir. Oxuməni.az xəbər verir ki, bu barədə “Politico” mənbələrə istinadən məlumat verib.
Nəşrin həmsöhbətləri qeyd ediblər ki, hələlik Qalibaf barədə heç bir qərar qəbul edilməyib. Prezident administrasiyasının əlavə etdiyinə görə, onlar "bir neçə namizədin stres testini" keçirmək istəyirlər.
Nəşrin mənbələrinin bildirdiyinə görə, bu namizədlər siyahısında İranın son şahı Rza Pəhləvinin oğlu yoxdur. “Politico”nun həmsöhbətləri Ağ Evin İran üçün "Venesuela ssenarisini" nəzərdən keçirdiyini bildiriblər. Bu ssenari, ölkədə dəstəyə malik olan və eyni zamanda ABŞ-a sadiq olan bir siyasətçinin hakimiyyətə gəlməsini nəzərdə tutur. Tramp administrasiyası Pəhləvinin İranda heç bir legitimliyə malik olacağına inanmır.
Bununla belə, “Politico” yazır ki, ekspertlər İranda parlament spikerinin öz növbəsində ABŞ-a sədaqət göstərəcəyinə şübhə edirlər.
"Qalibaf ambisiyalı və praqmatikdir, lakin eyni zamanda İslamçı quruluşun qorunmasına prinsipial olaraq sadiqdir," - deyə Beynəlxalq Böhran Qrupunda İran üzrə baş analitik Əli Vəiz bildirib. - "Bu, onu Vaşinqtona hər hansı əhəmiyyətli güzəştlər təklif etmək üçün real namizəd etmir."
Məhəmmədbəqir Qalibaf İran-İraq müharibəsi zamanı İslam İnqilabı Keşikçiləri Korpusunda xidmət edib. 1999-cu ildə İran polisinin rəisi təyin edilib. 2005-2017-ci illərdə Tehranın meri vəzifəsində çalışıb. 2020-ci ildən isə İran parlamentinin (Məclisin) spikeri vəzifəsini tutur.
“The Jerusalem Post” yazmışdı ki, Qalibaf ABŞ ilə danışıqlarda iştirak edib, bundan sonra Donald Tramp İranın elektrik stansiyalarına zərbələri beş gün təxirə salmaq qərarına gəldiyini elan edib. İran isə danışıqların faktını inkar edir.
Almaz Həsənli
Sonrakı hadisələr barədə daha çox məlumat almaq üçün ain.az saytını izləyin.
