Rusiyanın Saratov şəhərində bir qadın atasının ölümünə görə özəl tibb müəssisəsindən mənəvi ziyana görə kompensasiya alıb.
NOCOMMENT.az xəbər verir ki, bu barədə regional Federal Məhkəmə İcraçıları Xidməti məlumat yayıb.
Məlumata görə, kişi Saratovdakı özəl klinikalardan birində qastroskopiya proseduru zamanı müalicə alıb. Prosedur zamanı xəstənin qida borusunun divarı zədələnib və o, sonradan həyatını itirib.
Faktla bağlı proseduru həyata keçirən endoskopist Rusiya Cinayət Məcəlləsinin 109-cu maddəsinin 2-ci hissəsi ilə – peşə vəzifələrini lazımi qaydada yerinə yetirməməsi nəticəsində səhlənkarlıqdan ölümə səbəb olma maddəsi ilə ittiham olunub.
Mərhumun qızı mənəvi ziyana görə kompensasiya tələbi ilə məhkəməyə müraciət edib. Məhkəmənin qərarına əsasən, tibb mərkəzi mərhumun qızına 1 milyon rubl təzminat ödəməlidir.
Qərarın icrası üçün məhkəmə icraçıları tərəfindən özəl klinikaya qarşı icraat başlanıb. Klinikanın maliyyə vəziyyəti araşdırılıb, bank hesablarına həbs qoyulub. Bundan sonra borclu tərəf ödəniş planı üçün məhkəməyə müraciət edib. Məhkəmə vəsatəti təmin edib və klinika təzminatın tam məbləğini ödəyib.
