Google axtarış nəticələrində yer alan xəbər başlıqlarını və veb-sayt adlarını süni intellektin köməyi ilə dəyişdirməyə başlayıb.
KONKRET.az xəbər verir ki, son bir neçə ay ərzində Google bəzi xəbərlərin başlıqlarına gizli şəkildə müdaxilə edir. Dəyişdirilən hissələrin insan tərəfindən yazılmadığı məlum olduqdan sonra veb redaktorlar və məzmun istehsalçıları arasında böyük təəccüb yaranıb. Bu gözlənilməz vəziyyət yeni başlıqların haradan gəldiyi ilə bağlı haqlı suallar doğurub.
Texnologiya nəhəngi axtarış nəticələrindəki məzmun adlarını dəyişdirən kiçikmiqyaslı bir test həyata keçirdiyini təsdiqləyib. Şirkət bildirib ki, məqsəd istifadəçilərə axtarışlarına ən uyğun məzmunu təqdim etməkdir. Lakin sistem geniş tətbiq olunsa belə, bu prosesin “generativ süni intellekt” vasitəsilə aparılmayacağı xüsusi vurğulanıb.
Sistemin necə işlədiyinə dair təqdim olunan nümunələr göstərir ki, süni intellekt uzun və yumorlu mətnləri daha sadə və adi formaya salır.
Əksər veb-saytlar onsuz da “SEO” — yəni internetdə daha görünən olmaq məqsədilə — diqqətçəkən və fərqli başlıqlardan istifadə edir.
Lakin Google-ın bütün təşəbbüsü öz əlinə alaraq başlıqları öz bildiyi kimi yenidən yazması bir çoxları tərəfindən narahatedici hal kimi qiymətləndirilir. Bu yenilik yayımçıların internetdəki orijinallığına birbaşa kölgə salır. Oxucuya zorla təqdim olunan başlıqlar isə xəbərin əsas məzmununun təhrif olunması riskini artırır.
Ağagül Mürsəlov,
KONKRET.az
